काठमाडौं। समस्याग्रस्त सहकारीमा अड्किएको बचत फिर्ता प्रक्रिया जेठको पहिलो साताबाट सुरु हुने भएको छ।

समस्याग्रस्त सहकारी व्यवस्थापन समितिले मंगलबार सार्वजनिक गरेको कार्ययोजनाअनुसार माग दाबी गरेका बचतकर्ताहरूलाई प्राथमिकताका आधारमा रकम फिर्ता गर्ने प्रक्रिया अघि बढाइनेछ।

समितिका अनुसार जेठको पहिलो साताबाट बचत फिर्ता कार्य औपचारिक रूपमा सुरु गरिनेछ। त्यसैगरी, माग दाबी छुटेका बचतकर्ताका लागि साउनको पहिलो सातादेखि पुनः दाबी गर्ने अवसर खुला गरिने पनि जनाएको छ।

समितिले कर्जा असुली प्रक्रियालाई थप कडा बनाउने जनाएको छ। ऋणीहरूलाई किस्ताबन्दीमा कर्जा तिर्न लिखित प्रतिबद्धता दिएमा निश्चित समय उपलब्ध गराइनेछ। तर भुक्तानी नगर्ने ऋणीहरूको तीनपुस्ते विवरण सार्वजनिक गर्ने र उनीहरू तथा परिवारका सदस्यलाई समेत कालोसूचीमा राख्ने चेतावनी दिइएको छ।

समितिका अनुसार हाल देशभरका समस्याग्रस्त सहकारीहरूमा करिब ७६ हजार बचतकर्ताको करिब ४६ अर्ब रुपैयाँ फिर्ता गर्न बाँकी छ।

बचतकर्ताको रकम फिर्ता प्रक्रिया सुरु हुने घोषणाले लामो समयदेखि पर्खाइमा रहेका पीडितहरूमा आशा पलाएको भए पनि सम्पूर्ण रकम फिर्ता हुने समयरेखा भने अझै स्पष्ट भइसकेको छैन।