एजेन्सी। आर्टिफिसियल इन्टेलिजेन्स र रोबोटिक्स क्षेत्रमा चीन तीव्र गतिमा अगाडि बढिरहेको देखिएको छ। प्रयोगशालामा सीमित रहेको रोबोट प्रविधि अब दैनिक जीवनमा प्रवेश गर्न थालेको छ जसले चीनलाई विश्व रोबोटिक दौडमा अग्रणी देशमध्ये एक बनाइरहेको छ।

चीनले हाल एम्बोडिड एआई प्रविधिलाई तीव्र रूपमा अपनाइरहेको छ। यो यस्तो प्रविधि हो जसमा एआई प्रणालीलाई भौतिक रोबोटमा समावेश गरिन्छ जसले वातावरण बुझ्न निर्णय लिन र वास्तविक संसारमा काम गर्न सक्छ।

५८ डटकम सम्बन्धी रिपोर्टअनुसार मार्च महिनामा चीनमा सरसफाइ सेवामा मानव श्रमिकसँगै रोबोट पनि प्रयोग हुन थालेको छ। एक्स स्क्वायर रोबोट नामक स्टार्टअपले विकसित गरेको करिब १.५ मिटर अग्लो रोबोट सरसफाइ कार्यमा प्रयोग भइरहेको छ।

उक्त रोबोटले टेबल पुछ्ने भुइँ सफा गर्ने जस्ता काम गर्छ भने मानव श्रमिकले कठिन ठाउँहरू जस्तै भित्ताको चिल्लो हटाउने र टायल सफा गर्ने काम गर्छन्। रिपोर्टअनुसार रोबोटको प्रयोगले कामको बोझ करिब ३० प्रतिशतसम्म घटाएको छ।

यस कम्पनीलाई बाइटडान्स मेइतुआन शाओमी र अलिबाबा जस्ता ठूला प्रविधि कम्पनीहरूको समर्थन रहेको बताइएको छ। सेवाको लागत पनि मानव श्रमिकको सरसफाइ शुल्कसँग मिल्दोजुल्दो रहेको जनाइएको छ।

त्यसैगरी चीनका सहरहरूमा ट्राफिक व्यवस्थापनमा पनि रोबोट प्रयोग सुरु भएको छ। हाङ्चाउ शहरमा मे डेको बिदाको समयमा एआई-सञ्चालित १५ वटा ट्राफिक रोबोट तैनाथ गरिएको थियो।

यी रोबोटहरूले पैदल यात्रीलाई निर्देशन दिने साइकल चालकलाई सचेत गराउने र ट्राफिक नियन्त्रणमा सहयोग गर्ने काम गरिरहेका छन्। यी रोबोटहरू ठूला भाषा मोडेल सँग एकीकृत रहेको जनाइएको छ।

चीनको एआई प्लस पहल अन्तर्गत सन् २०३० सम्म अर्थतन्त्रको ठूलो हिस्सामा एआई समावेश गर्ने लक्ष्य राखिएको छ। यसले देशलाई प्रविधि र रोबोटिक्स क्षेत्रमा विश्व नेतृत्वतर्फ अघि बढाइरहेको विश्लेषण गरिएको छ।

विशेषज्ञहरूका अनुसार चीनले उत्पादन सेवा र सार्वजनिक व्यवस्थापनसम्म रोबोट विस्तार गरेसँगै विश्व रोबोटिक्स प्रतिस्पर्धामा अमेरिका र अन्य देशभन्दा अगाडि बढिरहेको देखिन्छ।