काठमाडौं। गगनकुमार थापाले नेपाली कांग्रेसका निवर्तमान कार्यवाहक सभापति पूर्णबहादुर खड्कासँग भेटवार्ता गरेका छन्। थापा उपसभापति विश्वप्रकाश शर्मासहित खड्काको गल्फुटारस्थित निवास पुगेका थिए।

सचिवालयका अनुसार बिहान भएको भेटवार्ता करिब ११ बजेबाट साढे १ घण्टासम्म चलेको थियो। भेटका क्रममा समसामयिक राजनीतिक अवस्था र पार्टीभित्रको रणनीतिक विषयमा छलफल भएको अनुमान गरिएको छ।

यद्यपि दुवै पक्षले औपचारिक विवरण सार्वजनिक गरेका छैनन्।

यसअघि मंगलबार बेलुकी तय गरिएको नेतात्रयबीचको भेट अन्तिम समयमा स्थगित भएको थियो। त्यसअघि बिहान थापाले वरिष्ठ नेता डा. शेखर कोइरालासँग पनि छुट्टै भेट गरेका थिए।

थापाले यसअघि पनि ६ वैशाखमा खड्कासँग भेट गरेका थिए। लगातार भइरहेका यी भेटघाटलाई नेपाली कांग्रेसभित्र आगामी राजनीतिक समीकरण र नेतृत्व व्यवस्थापनसँग जोडेर हेरिएको छ।

यद्यपि भेटको ठोस एजेन्डाबारे भने अहिलेसम्म औपचारिक रूपमा केही खुलाइएको छैन।