काठमाडौं। सरकारले वरिष्ठ चिकित्सक तथा चिकित्सा शिक्षाविद् प्रा. डा. जगदीशप्रसाद अग्रवाललाई प्रधानमन्त्री बालेन्द्र शाहको अवैतनिक स्वास्थ्य सल्लाहकारमा नियुक्त गरेको छ।

मंगलबार बसेको मन्त्रिपरिषद् बैठकले उनलाई उक्त जिम्मेवारीमा नियुक्त गर्ने निर्णय गरेको हो। त्रिभुवन विश्वविद्यालयअन्तर्गत चिकित्सा शास्त्र अध्ययन संस्थान (आईओएम) का पूर्वडीनसमेत रहेका अग्रवालले अब प्रधानमन्त्रीलाई स्वास्थ्य नीति, सार्वजनिक स्वास्थ्यका चुनौती र चिकित्सा शिक्षासम्बन्धी सुधारका विषयमा परामर्श दिनेछन्।

प्रधानमन्त्रीका प्रेस तथा अनुसन्धानविज्ञ दीपा दाहालका अनुसार अनुभवी चिकित्सक अग्रवालको नियुक्तिले सरकारलाई स्वास्थ्य नीति निर्माण र सेवा सुधारमा महत्वपूर्ण प्राविधिक सहयोग मिल्ने अपेक्षा गरिएको छ। उनले अग्रवालले कुनै पारिश्रमिक नलिई अवैतनिक रूपमा सेवा दिने पनि स्पष्ट गरिन्।

प्रधानमन्त्री बालेन्द्र शाह नेतृत्वको सरकारले सार्वजनिक स्वास्थ्यलाई प्रमुख प्राथमिकतामा राख्दै आएको सन्दर्भमा यो नियुक्तिलाई रणनीतिक रूपमा अर्थपूर्ण मानिएको छ।

डा. अग्रवालले राज्यबाट कुनै आर्थिक सुविधा नलिई विशेषज्ञ सल्लाहकारका रूपमा आफ्नो ज्ञान र अनुभव प्रदान गर्नेछन्।