काठमाडौं। नेपाली फिल्मका दुई स्थापित तथा लोकप्रिय अभिनेताद्वय दयाहाङ राई र सौगात मल्ल पुनः एकपटक एउटै पर्दामा देखिने भएका छन्। आगामी जेठ ८ गते प्रदर्शनमा आउने फिल्म मितज्यू मार्फत यी दुई कलाकारको चर्चित सहकार्य फेरि दर्शकमाझ आउन लागेको हो।

नेपाली फिल्म क्षेत्रमा दयाहाङ र सौगात सशक्त अभिनय र फरक-फरक पात्रका लागि परिचित छन्। उनीहरूको अभिनय शैली र पात्र निर्माण क्षमताका कारण दुवै कलाकार निर्माता–निर्देशकको पहिलो रोजाइमा पर्ने गरेका छन्।

यसअघि लुट र कबड्डी जस्ता सफल फिल्ममा सँगै काम गरेका यी दुई कलाकारको केमेस्ट्री दर्शकमाझ निकै लोकप्रिय बनेको थियो। विशेषगरी उनीहरूबीच देखिने तनाव, नोकझोक र प्रतिस्पर्धात्मक सम्बन्धले कथालाई थप आकर्षक बनाउने गरेको अनुभव छ।

आगामी फिल्म ‘मितज्यू’ ले पनि यही अपेक्षालाई निरन्तरता दिने संकेत गरेको छ। सार्वजनिक पोस्टर र टीजरमा दुवै कलाकार आमनेसामने देखिन्छन्, जहाँ उनीहरूको सम्बन्धमा नजिकपनसँगै मनोवैज्ञानिक द्वन्द्वको झल्को पनि स्पष्ट देखिन्छ।

निर्माण पक्षका अनुसार फिल्मको मुख्य आकर्षण नै दयाहाङ र सौगातबीचको मनोवैज्ञानिक टकराव हो। निर्माता जनक घर्ती मगरले पात्रको बनोट र द्वन्द्वले दर्शकलाई फरक अनुभव दिने विश्वास व्यक्त गरेका छन्।

अनिल बुढा मगर को निर्देशनमा बनेको यस फिल्ममा तेरिया फौजा मगर, पुस्कर गुरुङ, शिशिर वाङ्देल, राज थापा, सुवर्ण थापा, अनु थापा र स्मिता लामिछानेलगायत कलाकारको अभिनय रहेको छ। तेरिया फौजा मगरको यो डेब्यू फिल्म पनि हो।

प्राविधिक पक्षतर्फ लोकेश बज्राचार्यको सम्पादन, शिशिर बिशंखेको छायांकन र श्रीकृष्ण बम मल्लको संगीत रहेको छ। आरआर फिल्म्सले वितरण गर्ने यस फिल्मको डिजिटल अधिकार ओएसआर डिजिटल ले खरिद गरिसकेको छ।

दयाहाङ र सौगातको पुरानो सफल सहकार्यलाई आधार मान्दा ‘मितज्यू’ ले पनि दर्शकमाझ राम्रो प्रतिक्रिया पाउने अपेक्षा निर्माण पक्षले गरेको छ।