काठमाडौं।  राष्ट्रिय स्वतन्त्र पार्टी (रास्वपा)ले आगामी आर्थिक वर्षको बजेट तर्जुमासम्बन्धी पूर्वबजेट छलफलका लागि नेपाल सरकारका दुई मन्त्रीलाई आमन्त्रण गरेको छ।

रास्वपा संसदीय दलको कार्यालय, सिंहदरबारमा हुने उक्त छलफलमा संस्कृति, पर्यटन तथा नागरिक उड्डयन मन्त्री खडकराज पौडेल (गणेश) र सूचना तथा सञ्चार मन्त्री विक्रम तिमिल्सिना सहभागी हुनेछन्।

पार्टीका अनुसार बजेटका प्राथमिकता, नीति तथा कार्यक्रमका सम्भावित दिशाबारे सरकारसँग प्रारम्भिक समन्वय गर्ने उद्देश्यले छलफल आयोजना गरिएको हो।

छलफलमा विशेषगरी पर्यटन प्रवर्द्धन, सूचना प्रविधि विकास, सञ्चार पूर्वाधार विस्तार तथा डिजिटल गभर्नेन्सका विषयमा केन्द्रित हुने अपेक्षा गरिएको छ।

कार्यक्रम दिउँसो ४ बजेदेखि ६ बजेसम्म सञ्चालन हुनेछ।

छलफलमा रास्वपाका संघीय सांसदहरू तथा सम्बन्धित क्षेत्रका नीति विज्ञहरूको पनि उपस्थिति रहने बताइएको छ।

रास्वपाले बजेट निर्माण प्रक्रियामा संसदीय दलको सक्रिय भूमिका सुनिश्चित गर्न र सरकारसँग नीति–स्तरको समन्वय मजबुत बनाउन यस्ता पूर्वबजेट छलफललाई निरन्तरता दिँदै आएको जनाएको छ।