काठमाडौं। शुक्रबारदेखि प्रदर्शनमा आउन लागेको फिल्म ‘मालती मंगले’ ले प्रिमियर शोमै सकारात्मक प्रतिक्रिया पाएको छ। बुधबार आयोजित प्रिमियरमा फिल्म हेर्ने दर्शक तथा अतिथिहरूले यसको कथा, प्रस्तुति र कलाकारहरूको अभिनयको खुलेर प्रशंसा गरेका छन्।

प्रिमियरमा पुगेका राष्ट्रिय स्वतन्त्र पार्टी (रास्वपा) का सभापति रवि लामिछानेले फिल्म राम्रो बनेको प्रतिक्रिया दिए। निर्माता तथा गायक रामकृष्ण ढकालका पुराना साथीसमेत रहेका लामिछानेले फिल्मले नेपालमा भन्नैपर्ने महत्वपूर्ण कथा उठाएको बताए।

उनले भने, ‘मैले धेरै पछि फिल्म हेर्ने मौका पाएँ। यो फिल्म निकै राम्रो छ। कमेडी पनि छ, इमोशन पनि छ। कलाकारहरूको अभिनय र संवाद पनि राम्रो छ। निर्देशक नयाँ भए पनि अनुभव भएको जस्तो लाग्छ। म हाँसे पनि, इमोशनल पनि भएँ।’

प्रिमियर शोमा वरिष्ठ कलाकार मदनकृष्ण श्रेष्ठले पनि फिल्मको प्रशंसा गरेका थिए। कार्यक्रममा कलाकारहरू कृष्ण मल्ल, शर्मिला मल्ल, किरण केसी, यम बराल, सन्दीप क्षेत्री लगायत फिल्म तथा संगीत क्षेत्रका व्यक्तिहरूको उपस्थिति रहेको थियो।

रानी फिल्म्सको ब्यानरमा युनि इन्टरटेन्मेन्टको सहकार्यमा निर्माण भएको फिल्म ‘मालती मंगले’ का निर्देशक प्रकु पाण्डेय हुन्। फिल्मको कथा निर्देशक पाण्डेयले नै लेखेका हुन् भने पटकथा तथा संवाद संयोग गुरागाईंले तयार पारेका छन्।

फिल्ममा विजय बराल, वर्षा राउत, मेक्सम गौडेल, प्रकाश घिमिरे, सरिता गिरी, नरिन थापा, मान्सु सापकोटा, सुस्मा निरौला र सुनिल तामाङ लगायतका कलाकारहरूको अभिनय रहेको छ।

सागर ज्ञवाली कार्यकारी निर्माता रहेको फिल्ममा बाबु सुवेदी, रबिन श्रेष्ठ, वेदना कर्माचार्य, पद्मावती गुरुङ, स्वीकृति बस्नेत र मिलन बजगाईँ सह-निर्माताका रूपमा रहेका छन्।

छायांकन महेश पौडेलले गरेका हुन् भने सम्पादन रोमी मोजेज, रंग संयोजन कृष्ण भण्डारी, ब्याकग्राउन्ड स्कोर सुजिल कर्माचार्य र ध्वनि मिश्रण डिकेश खड्गीले गरेका छन्।

आरआर फिल्म्सले वितरण गर्ने यो फिल्म शुक्रबारदेखि देशव्यापी रूपमा प्रदर्शनमा आउँदैछ। फिल्मको अग्रिम टिकट बुकिङसमेत खुलिसकेको छ।