सुर्खेत । अनलाइन जुवा (बेटिङ) सञ्चालन तथा बैंक खाता दुरुपयोग गरी शंकास्पद आर्थिक कारोबार गरेको आरोपमा प्रहरीले तीन जनालाई पक्राउ गरेको छ ।

ईलाका प्रहरी कार्यालय बाबियाचौरका अनुसार सामाजिक सञ्जाल तथा इन्टरनेटमार्फत अनलाइन जुवा सट्टेबाजी सञ्चालन भइरहेको गोप्य तथा प्राविधिक सूचनाका आधारमा अनुसन्धान गर्दा उनीहरू संलग्न रहेको खुलेपछि पक्राउ गरिएको हो ।

पक्राउ पर्नेमा पञ्चपुरी नगरपालिका–९ का ३९ वर्षीय महेन्द्रकुमार बोहरा, ४२ वर्षीय यामलाल विक र ४४ वर्षीय डम्बर विक रहेका छन् ।

जिल्ला प्रहरी कार्यालय सुर्खेतका प्रवक्ता मोहनजंग बुटथापाका अनुसार शिक्षक पेशामा संलग्न बोहराले विभिन्न बैंकमा ६ वटा खाता खोली अनलाइन बेटिङ तथा ठगीमा प्रयोग गरेको प्रारम्भिक अनुसन्धानमा खुलेको छ ।

उनको खातामार्फत करिब २ करोड ४६ लाख रुपैयाँ बराबरको शंकास्पद कारोबार भएको प्रहरीले जनाएको छ ।

त्यस्तै, व्यवसायी यामलाल विकले ५ वटा बैंक खाता सञ्चालन गरी शंकास्पद कारोबार गरेको तथा होटल व्यवसायी डम्बर विकले ९ वटा बैंक खाता खोलेर दुरुपयोग गरेको पाइएको प्रहरीले जनाएको छ ।

उनीहरूलाई बैंकिङ कसुर, जुवा सट्टेबाजी तथा सम्पत्ति शुद्धीकरणसम्बन्धी कसुरमा थप अनुसन्धानका लागि नियन्त्रणमा लिइएको प्रहरीले जनाएको छ ।