काठमाडौं । सर्वोच्च अदालतको इजलासमै हुलहुज्जत गरेपछि वादी अभियन्ता रोशनी वादीलाई प्रहरीले पक्राउ गरेर नियन्त्रणमा लिएको छ ।

उनी हाल सिंहदरबार प्रहरी वृत्तको नियन्त्रणमा रहेको काठमाडौं प्रहरीका प्रवक्ता पवन भट्टराईले जानकारी दिएका छन् ।

अभियन्ता वादी हाल प्रदर्शनमा रहेको चलचित्र लालीबजार विरुद्धको मुद्दामा बहसका लागि सर्वोच्च अदालत पुगेकी थिइन् । आफ्नै रिटमाथि सुनुवाइ भइरहँदा उनले इजलासमै हुलहुज्जत गरेको प्रहरीको भनाइ छ ।

प्रहरीका अनुसार अदालत परिसरमै अशान्ति सिर्जना भएपछि उनलाई नियन्त्रणमा लिएर प्रहरी वृत्तमा राखिएको हो ।

रोशनी वादीले उक्त चलचित्रले वादी समुदायका महिलाको छवि बदनाम गरेको भन्दै प्रदर्शन रोक्न माग गर्दै रिट दायर गरेकी थिइन् ।

यसअघि पनि उनी विभिन्न विरोध कार्यक्रमका क्रममा चर्चामा आएकी थिइन्, जसमा केही दिनअघि रास्वपा सभापति रवि लामिछानेको गाडी अगाडि सुत्ने घटना पनि परेको थियो ।