काठमाडौं। भारतीय आर्थिक वर्ष २०२५/२६ (अप्रिल २०२५–मार्च २०२६) मा भारतको कुल गार्हस्थ उत्पादन (जीडीपी) ७.७ प्रतिशतले वृद्धि हुने अनुमान गरिएको छ । यसअघि आर्थिक वर्ष २०२४/२५ मा ७.१ प्रतिशतको आर्थिक वृद्धि रहेको सरकारी तथ्याङ्कले देखाएको थियो ।

शुक्रबार सार्वजनिक तथ्याङ्कअनुसार भारतको अर्थतन्त्रले जनवरी–मार्च त्रैमासिकमा मात्र ७.८ प्रतिशतको वृद्धि हासिल गरेको छ । मध्यपूर्वमा जारी भूराजनीतिक तनावका बीच पनि भारतीय अर्थतन्त्रले मजबुत प्रदर्शन गरेको देखिएको छ ।

तथ्याङ्क अनुसार प्राथमिक क्षेत्रमा ३.२ प्रतिशतको वृद्धि भएको छ, जसमा कृषि र मत्स्य क्षेत्रको योगदान प्रमुख रहेको जनाइएको छ ।

त्यसैगरी उत्पादन, व्यापार, होटल, यातायात, सञ्चार तथा प्रसारण र अचल सम्पत्ति जस्ता सेवा क्षेत्रहरूमा दोहोरो अंकको वृद्धि देखिएको छ । सेवा क्षेत्रको विस्तारले समग्र आर्थिक वृद्धिलाई थप बल दिएको विश्लेषण गरिएको छ ।

समग्रमा सार्वजनिक तथ्याङ्कले भारतीय अर्थतन्त्र आगामी आर्थिक वर्षमा पनि उच्च वृद्धिदर कायम राख्ने संकेत गरेको छ, यद्यपि विश्वव्यापी अस्थिरताका जोखिम भने कायमै रहेको उल्लेख गरिएको छ ।