शिकागो, इलिनोइस। नेपाली समुदायको साझा सपना तथा भावी पुस्ताको पहिचानको केन्द्रका रूपमा निर्माण हुन गइरहेको नेपाली सांस्कृतिक केन्द्र (NCCC) स्थापना अभियानलाई सहयोग पुर्‍याउने उद्देश्यले अमेरिकाको इलिनोइस राज्यमा आगामी जुलाई ५ देखि ११, २०२६ सम्म “श्रीमद्भागवत सप्ताह ज्ञान महायज्ञ तथा शिकागो आध्यात्मिक महोत्सव २०२६” भव्य रूपमा आयोजना हुने भएको छ।

आध्यात्मिक जागरण, धार्मिक एकता तथा नेपाली भाषा, कला, संस्कृति र परम्पराको संरक्षण एवं प्रवर्द्धन गर्ने मूल उद्देश्यका साथ आयोजना हुन लागेको यस महोत्सवमा नेपालका सुप्रसिद्ध वाचन प्रवीण पूज्य पण्डित दीनबन्धु पोखरेलज्यू को मुखारविन्दबाट श्रीमद्भागवत महापुराणको दिव्य कथा वाचन हुने आयोजक समितिले जनाएको छ।

सप्ताहव्यापी महोत्सवमा दैनिक कथा प्रवचन, पूजा–आराधना, भजन–कीर्तन, सत्सङ्ग, धार्मिक अनुष्ठान तथा विविध आध्यात्मिक कार्यक्रमहरू सञ्चालन गरिनेछन्। आयोजकका अनुसार कार्यक्रममा अमेरिका लगायत विभिन्न राज्यबाट हजारौँ श्रद्धालु भक्तजन तथा नेपाली समुदायको उल्लेखनीय सहभागिता रहने अपेक्षा गरिएको छ।

महायज्ञबाट संकलित सम्पूर्ण सहयोग नेपाली समुदायको दीर्घकालीन आवश्यकता तथा साझा सम्पत्तिका रूपमा निर्माण हुन गइरहेको नेपाली सांस्कृतिक केन्द्र (NCCC) को स्थापना अभियानमा समर्पित गरिनेछ। उक्त केन्द्र नेपाली भाषा, कला, संस्कृति, धार्मिक गतिविधि तथा भावी पुस्तालाई आफ्नो मौलिक पहिचानसँग जोड्ने साझा थलोका रूपमा विकास गरिने लक्ष्य रहेको बताइएको छ।

महायज्ञ मूल समारोह समितिका संयोजक बाला घिमिरे, सहसंयोजक खेम पाठक, सचिवालय सचिव तथा सहसंयोजक श्याम पराजुली, तथा सहसंयोजक एवं प्रचार–प्रसार संयोजक शिव अधिकारी लगायत सम्पूर्ण आयोजक परिवारले अमेरिकाभर रहेका नेपाली समुदाय, धर्मप्रेमी महानुभाव, बुद्धिजीवी, समाजसेवी तथा श्रद्धालु भक्तजनहरूलाई सपरिवार उपस्थित भई यस ऐतिहासिक धार्मिक एवं सांस्कृतिक महाअभियानलाई सफल बनाउन हार्दिक अनुरोध गरेका छन्।

आयोजक समितिका अनुसार सम्पूर्ण भक्तजनहरूको साथ, सहयोग र सहभागिताबाट यो महायज्ञ नेपाली समुदायको इतिहासमा एक अविस्मरणीय, प्रेरणादायी तथा ऐतिहासिक अध्यायका रूपमा स्थापित हुने विश्वास लिइएको छ।

📍 स्थान:
101 S Church Rd, Bensenville, IL 60106, USA

विशेष आह्वान

“घर–घरबाट उठौँ, नगर–नगरबाट जुटौँ ।
नेपाली संस्कार, संस्कृति र पहिचान जोगाउने यस महाअभियानमा सहभागी बनौँ ।”