काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेलाई विधि, विधान र सुशासनका पक्षधर नेताका रूपमा चिनिन्छ। अन्यायमा परेकाको पक्षमा बोल्ने नेताका रूपमा पनि उनले छवि बनाएका छन्।

तर, अहिले उनीबाटै पार्टीका एक जना सांसद अन्यायमा परेका छन् । उनी हुन्- सा‌ंसद साेम शर्मा ।  निर्वाचित भए पनि शर्मालाई सभापति रविले केन्द्रीय सदस्य बनाएनन् । यससँगै पार्टीमा विधि र विधान कार्यान्वयनप्रतिकाे उनकाे प्रतिबद्धतामा प्रश्‍न उठेकाे छ ।

सांसद शर्माले नेपालवान एचडीसँग आफू अन्यायमा परेको गुनासो गरेका छन्। यद्यपि, सभापति लामिछानेले न्याय दिने विश्‍वास भने उनले मारेका छैनन् ।

उनले भने, ‘मलाई अन्याय भयो । म चौथोमा थिएँ । जेनजीको मुद्दा जनताका मुद्दा संस्थागत गर्न मेरो उम्मेदवारी थियो । मलाई थाहा छैन, किन यस्तो भयो । मलाई विश्वास छ, पक्कै पनि नेतृत्वले पुनर्विचार गर्छ होला र मैले न्याय पाउँछु ।’

यही असारकाे ७ गतेदेखि झण्डै एक साता भएकाे महाधिवेशनबाट गण्डकी भूगोलतर्फ शर्मा  केन्द्रीय सदस्यमा निर्वाचित भएका थिए । तर, बिना जानकारी र बिना कारण केन्द्रीय सदस्यबाट आफूलाई हटाएकाे भन्दै उनले पार्टीकाे निर्वाचन आयाेगमा निवेदन दिएका छन् ।

शर्माले आफूभन्दा कम मत प्राप्त गर्ने उम्मेदवारलाई केन्द्रीय सदस्य बनाइएको दाबी गरेका छन्। यसले रास्वपाले उठाउँदै आएको विधि, विधान र सुशासनको एजेन्डामाथि नै प्रश्न उठाएको उनको भनाइ छ।

जेन-जी अभियानका अग्रपंक्तिका नेता मानिने शर्मा नयाँ पुस्ताको एजेन्डा उठाउने प्रभावशाली नेतामध्ये एक हुन्।

महाधिवेशनमा उनले गण्डकी भूगोलतर्फ ९९३ मत प्राप्त गरेका थिए। निर्वाचन समितिले मतपरिणामकाे आधारमा उनको जित घोषणा गरेको पनि उनको भनाइ छ।

कुनै पूर्वजानकारी आफ्नो नाम हटाइएको उनको गुनासो छ। सञ्चार माध्यमबाट मात्रै यसबारे जानकारी पाएको उनले उल्लेख गरेका छन्।

शर्माले रास्वपाको विधानको दफा २२(४) अनुसार आफू निर्वाचित भएको दाबी गरेका छन्। आफू चौथो उच्च मत प्राप्त उम्मेदवार भएकाले आफ्नो निर्वाचित हैसियतमा कुनै विवाद नरहेको उनको जिकिर छ।

शर्माले आफूलाई निर्वाचित केन्द्रीय सदस्यको हैसियतमा यथावत् कायम गर्न माग गरेका छन्। निर्णयको कानुनी तथा तथ्यगत आधार सार्वजनिक गर्न पनि आग्रह गरेका छन्। आवश्यक स्पष्टीकरण उपलब्ध गराउन उनले माग गरेका छन्।

रास्वपाकाे निर्वाचन आयाेगका अनुसार पवित्रा थापाले १०७६ मत, मनिष खनालले १०५२ मत, सागर भुसालले १०४० मत, साेम शर्माले ९९३ मत, पूजा बास्ताेलाले ९१३ मत र विष्णुकमारी गुरुङले ८०० मत पाएकी थिइन् ।

तर निर्वाचित भएका शर्मा हटाइए, पूजा र विष्णुकाे नाम केन्द्रीय सदस्यमा अँटाएका छन् । यसले रास्वपा सभापति लामिछानेकाे विधि र प्रक्रियाकाे प्रतिबद्धता कमजाेर देखिएकाे छ ।

यस्ताे छ साेम शर्माकाे निवेदन