बुटवल । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले प्रधानमन्त्री वालेन्द्र शाह नेतृत्वको सरकारको पहिलो १०० दिनको कार्यकाल पूर्ण रूपमा असफल भएको टिप्पणी गरेका छन्।

शनिबार बुटवलमा आयोजित पार्टीको लुम्बिनी प्रदेशस्तरीय बैठक तथा प्रशिक्षण कार्यक्रममा सहभागी हुन पुगेका पूर्वप्रधानमन्त्री प्रचण्डले पत्रकारहरूसँग कुरा गर्दै सरकारले जनतालाई देखाएको आश्वासन र अपेक्षाअनुसार काम गर्न नसकेको आरोप लगाए।

‘जनतालाई जुन आश्वासन र भ्रम देखाएर यो सरकार बनेको थियो, त्यसको आधारमा मूल्याङ्कन गर्दा पहिलो १०० दिन पूर्णतः असफल देखिएको छ,’ उनले भने।

राजनीतिक सहकार्यबारे धारणा राख्दै प्रचण्डले अहिलेको राष्ट्रिय परिस्थितिमा केवल वामपन्थी एकता मात्र पर्याप्त नहुने बताए। मुलुकको स्थिरता, संविधानको प्रभावकारी कार्यान्वयन र आर्थिक समृद्धिका लागि नेपाली कांग्रेस, एमालेसहित सबै प्रमुख राजनीतिक शक्तिबीच सहकार्य आवश्यक रहेको उनको भनाइ थियो।

उनले वर्तमान राजनीतिक गतिरोध अन्त्य गर्न सबै दलहरू साझा राष्ट्रिय एजेन्डामा एकजुट हुनुपर्नेमा जोड दिँदै आफ्नो पार्टी पनि त्यसै दिशामा पहल गरिरहेको बताए।