काठमाडौं । गायिका सुजता केसीको नयाँ लोकदोहोरी गीत ‘कसले देला बर’८सार्वजनिक गरिएको छ । दोस्रो सन्तानको जन्मको प्रतीक्षामा रहेकी सुजताले आफ्ना दर्शक–श्रोताका लागि विशेष उपहारस्वरूप यो गीत ल्याएकी हुन्।

गीतमा सुजता केसीसँगै रमेश परियारको स्वर रहेको छ भने संगीत पनि रमेशकै रहेको छ। बिमल छिनालको संगीत संयोजन रहेको गीतको भिडियोमा बिना राउत, सुरेश कोहली, सरोज प्रजा र सन्जना गुरुङको अभिनय देख्न सकिन्छ। सुनिल बिकेको निर्देशनमा तयार भएको भिडियो पशुपति मन्दिर आसपासका क्षेत्रमा छायांकन गरिएको हो। भिडियोको कोरियोग्राफी रोशन विश्वकर्माले गरेका छन् भने छायांकन मिलन थापा र सम्पादन सुप्रिम पराजुलीले गरेका हुन्।

गायिका सुजताका अनुसार गीत केही महिनाअघि नै रेकर्ड गरिएको भए पनि भिडियो भने अहिले सार्वजनिक गरिएको हो।गीत सार्वजनिक हुनुअघि गत शुक्रबार काठमाडौंको चिया फल्चामा आयोजित कार्यक्रममा सुजता गर्भावस्थाकै अवस्थामा उपस्थित भएकी थिइन्। उनी अब करिब एक साताभित्र दोस्रो सन्तानलाई जन्म दिने तयारीमा छिन्।यसअघि सुजताका ‘पाइएन ओखती दिल दुखेको’ र ‘आलु तामाले’ लगायतका गीतले दर्शक–श्रोतामाझ राम्रो लोकप्रियता पाएका थिए।