काठमाडौँ । गायिका चन्द्रमाया जुग्जालीको नयाँ मौलिक कौराहा गीत ‘मन पर्ने मायालु’ सार्वजनिक गरिएको छ। शनिबार काठमाडौँमा आयोजित विशेष कार्यक्रममा वरिष्ठ लोक गायक खड्ग गर्बुजाले गीतको विमोचन गरेका हुन्। सागर विरहीको शब्द, भाका र एरेन्जमा तयार भएको गीतमा सागर विरही, दिपिका बयम्बु मगर र चन्द्रमाया जुग्जालीको स्वर रहेको छ।

गीतमा गंगा थापा मगर, दुर्गा गापा र राम छन्त्यालले कोरस गायनमा साथ दिएका छन्। म्याग्दीको बिम गाउँलाई केन्द्रमा राखेर प्रेमभाव झल्काउने गीतको भिडियोमा मनोज गुरुङ र लक्ष्मी थापा मगरको रोमान्टिक अभिनय प्रस्तुत गरिएको छ। भिडियोको निर्देशन सागर विरहीले गरेका हुन् भने सम्पादन अमृत चापागाईले गरेका छन्।

राजाराम सिंम्खडाको कोरियोग्राफी, सुरेश श्रेष्ठको सिनेमेटोग्राफी तथा निर्मला आचार्यको मेकअप रहेको भिडियो गोलढुंगा स्थित उज्वल कला कुटीमा छायांकन गरिएको हो। भिडियो चन्द्रमाया जुग्जालीको आधिकारिक युट्युब च्यानलमार्फत सार्वजनिक गरिएको छ। यसअघि गायिका जुग्जालीका ‘ज्यानकै बाजी भो’, ‘कान्छी माया’, ‘आमा’, ‘तगारो’ र ‘सरर रेलैमा’ लगायतका गीतले दर्शक–श्रोतामाझ राम्रो चर्चा बटुलिसकेका छन्।

विमोचन कार्यक्रममा बोल्दै सर्जक सागर विरहीले म्याग्दीसँग जोडिएको मौलिक कौराहा सिर्जना गर्न पाउँदा खुसी लागेको बताए। उनले भने, “मौलिक सिर्जनामा पौडी खेल्नुको मजा नै बेग्लै छ। लोक पारखीहरूले पनि यो गीतलाई मन पराउनुहुनेछ भन्ने विश्वास छ।” कार्यक्रममा म्याग्दी समाजसँग आबद्ध विभिन्न विशिष्ट व्यक्तित्वहरूको समेत उल्लेखनीय उपस्थिति रहेको थियो।

दुई दशकभन्दा बढी समयदेखि नेपाली लोकसंगीत क्षेत्रमा सक्रिय सागर विरही सिर्जना, गायन, एरेन्ज, निर्देशन र अभिनय सबै क्षेत्रमा समान रूपमा सक्रिय सर्जकका रूपमा परिचित छन्। ‘मन पर्ने मायालु’ले नेपाली मौलिक कौराहा संस्कृतिलाई नयाँ पुस्तामाझ थप लोकप्रिय बनाउने अपेक्षा गरिएको छ।