विराटनगर । मोरङको सुन्दरहरैँचा नगरपालिका-१० स्थित सुकुना माध्यमिक विद्यालयका दुई शिक्षक र एक सवारी चालक छात्रामाथि दुर्व्यवहार गरेको आरोपमा पक्राउ परेका छन्।

जिल्ला प्रहरी कार्यालय मोरङका अनुसार पक्राउ पर्नेमा सुन्दरहरैँचा-२ का ३० वर्षीय किशोरलाल गच्छदार, सुन्दरहरैँचा-१२ का ३५ वर्षीय अबिरल मास्के र सुन्दरहरैँचा-१० का ४० वर्षीय प्रदीप भट्टराई रहेका छन्। भट्टराई विद्यालयका सवारी चालक हुन् भने गच्छदार र मास्के सोही विद्यालयका शिक्षक हुन्।

प्रहरीका अनुसार विद्यालयका केही छात्रालाई मोबाइलमार्फत व्यक्तिगत सन्देश पठाउने, परीक्षामा उत्तीर्ण गराइदिने आश्वासन दिने तथा अमर्यादित व्यवहार गरेको भन्ने उजुरीपछि अनुसन्धान सुरु गरिएको थियो। घटनाको विरोधमा विद्यार्थीहरूले प्रदर्शन गर्ने तयारी गरेपछि प्रहरीले उनीहरूलाई नियन्त्रणमा लिएको जनाएको छ।

मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार प्रारम्भिक अनुसन्धानका क्रममा प्राप्त सूचनाका आधारमा तीनै जनालाई पक्राउ गरिएको हो। घटनामा यौनजन्य दुर्व्यवहारसमेत भएको हुन सक्ने आशंकामा प्रहरीले अनुसन्धानको दायरा थप फराकिलो बनाएको छ।

प्रहरीले घटनासम्बन्धी प्रमाण संकलन, पीडित तथा सम्बन्धित पक्षसँग बयान लिने कार्य जारी रहेको जनाएको छ। डीएसपी मिश्रका अनुसार घटनाको सबै पक्षबाट अनुसन्धान भइरहेको छ र अनुसन्धानको निष्कर्षका आधारमा आवश्यक कानुनी प्रक्रिया अघि बढाइनेछ।