काठमाडौं। लगातारको वर्षापछि ललितपुरको महालक्ष्मीस्थानमा सडक भासिँदा ठूलो दुर्घटना हुनबाट जोगिएको छ।

महालक्ष्मी नगरपालिका–३ स्थित उक्त क्षेत्रमा सोमबार सडकको एक भाग भासिएपछि आसपासका पसल तथा संरचनामा जोखिम बढेको हो।

सडक भासिएसँगै त्यसको छेउमा रहेका फर्निचर, क्याफे र किराना पसल प्रत्यक्ष जोखिममा परेका छन्। सडकसँग जोडिएको पर्खाल कमजोर भएकाले सडक भासिने क्रममा माटोसहित पर्खालको भाग फर्निचरतर्फ खसेको थियो।

घटना हुँदा फर्निचरभित्र छ जना व्यक्ति रहेका थिए। बाहिर अचानक ठूलो आवाज आएपछि उनीहरू तत्काल बाहिर निस्किएकाले मानवीय क्षति हुन पाएन।

फर्निचर सञ्चालकका अनुसार भवनभित्र जडान गरिएका चारवटा फलामे संरचनाले भासिएको माटो र पर्खाललाई अड्याएर राखेकाले ठूलो क्षति हुनबाट जोगिएको हो। सडकको भार थेग्ने क्रममा तीमध्ये केही फलामका संरचना बाङ्गिएका छन्, जसले भासिएको भागबाट परेको दबाबको अवस्था देखाएको छ।

घटनापछि स्थानीयवासीमा त्रास फैलिएको छ। वर्षा जारी रहेकाले थप भासिने जोखिम हुन सक्ने भन्दै सम्बन्धित निकायले तत्काल प्राविधिक अध्ययन गरी आवश्यक सुरक्षा व्यवस्था मिलाउनुपर्ने माग स्थानीयले गरेका छन्।

तस्वीरहरू: