ललितपुर। चक्रपथअन्तर्गत ललितपुरको एकान्तकुना क्षेत्रमा दीर्घकालीन ढल निकास सुधारको काम सुरु गरिएको छ। वर्षेनि वर्षाका कारण सडक भासिने र पर्खालमा क्षति पुग्ने समस्या दोहोरिन थालेपछि सडक डिभिजन कार्यालय, ललितपुरले सुधार अभियान अघि बढाएको हो।

हाल सडकको एक भाग भत्काएर प्रभावकारी ढल निकास प्रणाली निर्माणको काम भइरहेको छ। सडक डिभिजनका कर्मचारीहरूले पुरानो संरचना हटाएर पानीको निकास सहज हुने गरी नयाँ ढल प्रणाली निर्माण गरिरहेका छन्।

यस क्षेत्रमा पर्याप्त ढल निकासको व्यवस्था नहुँदा हरेक वर्ष वर्षायाममा सडक भासिने, पानी जम्ने तथा सडक किनारको पर्खाल भत्किने जोखिम बढ्दै आएको थियो। सोही समस्याको दीर्घकालीन समाधानका लागि अहिले संरचनागत सुधारको काम भइरहेको सडक डिभिजनले जनाएको छ।

निर्माण कार्य सम्पन्न भएपछि वर्षाको पानी सहज रूपमा निकास हुने, सडक भासिने जोखिम कम हुने तथा चक्रपथको यस खण्डमा सवारी आवागमन थप सुरक्षित र व्यवस्थित हुने अपेक्षा गरिएको छ।