काठमाडौं। लगातारको वर्षापछि बुधबार बिहान काठमाडौं उपत्यकाको मौसम केही खुलेको छ।

केही दिनदेखि मनसुनी वर्षाले प्रभावित बनेको जनजीवनमा बुधबार बिहान केही राहत देखिएको हो।

निरन्तरको वर्षाका कारण उपत्यकाका विभिन्न स्थानमा डुबान, सडक भासिने तथा आवागमन प्रभावित हुने अवस्था सिर्जना भएको थियो। मौसम खुलेसँगै काठमाडौंका जगडोल, हलचोक, ह्वाइट गुम्बालगायत क्षेत्रबाट उपत्यकाको दृश्य पनि छर्लङ्ग देखिएको छ।

यद्यपि, मौसम पूर्वानुमान महाशाखाले मनसुनी वायुको प्रभाव अझै कायम रहेकाले वर्षाको जोखिम टरेको छैन। महाशाखाका अनुसार आगामी तीन दिन काठमाडौं उपत्यकासहित देशका धेरै स्थानमा मेघगर्जन तथा चट्याङसहित मध्यमदेखि भारी वर्षा हुन सक्ने सम्भावना छ।

कोशी, बागमती, गण्डकी, लुम्बिनी र कर्णाली प्रदेशका पहाडी भूभागका एक–दुई स्थानमा भारी वर्षा हुने अनुमान गरिएको छ।

सम्भावित भारी वर्षाका कारण बाढी, पहिरो, गेग्रान, नदी-नालामा बहाव बढ्ने तथा भूक्षयजस्ता जोखिम रहन सक्ने भएकाले सतर्कता अपनाउन महाशाखाले आग्रह गरेको छ।

तस्वीरहरू: