काठमाडौं। ४८औँ पुष्पलाल स्मृति दिवसको अवसरमा शुक्रबार आयोजित विचार गोष्ठीमा नेपालका प्रमुख वामपन्थी नेताहरू एउटै मञ्चमा सहभागी भएका छन्।

‘वर्तमान राजनीतिक परिस्थितिमा वामपन्थी दलहरूको भूमिका’ विषयक गोष्ठी पुष्पलाल मित्रता केन्द्रले आयोजना गरेको हो। कार्यक्रममा विभिन्न कम्युनिस्ट दलका शीर्ष नेताहरूले वर्तमान राजनीतिक अवस्था, वाम आन्दोलनको दिशा, लोकतन्त्रको सुदृढीकरण तथा वाम शक्तिबीच सहकार्य र एकताका सम्भावनाबारे आफ्नो धारणा राखेका छन्।

गोष्ठीमा नेपाल कम्युनिस्ट आन्दोलनका वरिष्ठ नेता मोहनविक्रम सिंह, नेकपाका संयोजक पुष्पकमल दाहाल ‘प्रचण्ड’,  सहसंयोजक माधवकुमार नेपाल तथा नेकपा (एमाले)का नेता प्रदीप ज्ञवाली सहित विभिन्न वामपन्थी दलका नेता तथा कार्यकर्ताको उपस्थिति रहेको थियो।

पुष्पलाल श्रेष्ठको राजनीतिक योगदानको स्मरण गर्दै आयोजित कार्यक्रममा सहभागी नेताहरूले वर्तमान राजनीतिक चुनौती, संविधानको कार्यान्वयन, सुशासन, सामाजिक न्याय तथा वाम आन्दोलनको भविष्यबारे विचार व्यक्त गरेका थिए।

पुष्पलाल मित्रता केन्द्रले प्रत्येक वर्ष पुष्पलाल स्मृति दिवसको अवसरमा यस्ता वैचारिक कार्यक्रम आयोजना गर्दै आएको छ। यस वर्षको कार्यक्रममा विभिन्न वाम धारका शीर्ष नेताहरू एउटै मञ्चमा देखिनुलाई राजनीतिक वृत्तमा अर्थपूर्ण रूपमा हेरिएको छ।