एजेन्सी। युरोपका दुई देश फ्रान्स र स्पेन अहिले भीषण डढेलोको चपेटामा परेका छन्।

लामो समयदेखि परेको खडेरी र तीव्र गतिमा चलेको हावाले आगो नियन्त्रणभन्दा बाहिर पुगेपछि दुवै देशले ठूलो मानवीय र भौतिक क्षति व्यहोर्नुपरेको छ।

डढेलोका कारण हालसम्म एक लाख ६० हजारभन्दा बढी मानिसलाई सुरक्षित स्थानमा सारिएको छ भने आगो नियन्त्रणका लागि युरोपेली सङ्घ (इयू) को सहयोगसमेत मागिएको छ।

सबैभन्दा बढी प्रभावित फ्रान्सको दक्षिणपश्चिमी बोर्डो क्षेत्र बनेको छ। त्यहाँबाट मात्रै करिब एक लाख ४१ हजार मानिसलाई विस्थापित गरिएको छ। स्पेनको राजधानी म्याड्रिड आसपासको क्षेत्रमा पनि आगो तीव्र रूपमा फैलिएपछि करिब २५ हजार बासिन्दालाई सुरक्षित स्थानमा सारिएको अधिकारीहरूले जनाएका छन्।

विस्थापितमध्ये एक हजार २०० भन्दा बढी वृद्धवृद्धा तथा अपाङ्गता भएका व्यक्ति रहेका छन्। उनीहरूलाई विशेष सुरक्षा व्यवस्थासहित सुरक्षित आश्रयस्थलमा राखिएको छ।

फ्रान्सको प्रमुख पर्यटकीय गन्तव्य क्याप फेरेट प्रायद्वीप डढेलोबाट सबैभन्दा बढी प्रभावित क्षेत्रमध्ये एक बनेको छ। उक्त क्षेत्रबाट मात्रै करिब ४४ हजार स्थानीय बासिन्दा र पर्यटकको उद्धार गरिएको छ। उद्धारका लागि डुङ्गा र सवारी साधन प्रयोग गरिएको थियो। आगलागीका कारण त्यहाँ ५० भन्दा बढी घर पूर्ण रूपमा नष्ट भएका छन्।

डढेलोको गम्भीर अवस्थालाई ध्यानमा राख्दै फ्रान्सेली राष्ट्रपति इमानुएल म्याक्रोनले सेनालाई परिचालन गर्न निर्देशन दिएका छन्। उनले आगो नियन्त्रणका लागि युरोपेली सङ्घसँग थप सहयोगको आग्रहसमेत गरेका छन्। फ्रान्सका गृहमन्त्री लरेन्ट नुनेजले देशले अहिलेसम्मकै सबैभन्दा भीषण डढेलोको सामना गरिरहेको बताएका छन्।

फ्रान्सले आगो नियन्त्रणका लागि करिब एक हजार सैनिक परिचालन गरेको छ। साथै, धुवाँका कारण स्वास्थ्यमा असर नपरोस् भनेर प्रभावित क्षेत्रका बासिन्दा र उद्धारकर्मीलाई १५ लाखवटा एफएफपी–२ मास्क वितरण गर्ने तयारी गरिएको छ।

यता स्पेनमा पनि अवस्था चुनौतीपूर्ण बनेको छ। म्याड्रिड क्षेत्रीय आपतकालीन व्यवस्थापन प्रमुख कार्लोस नोभिलोका अनुसार राजधानी आसपास फैलिएको डढेलो अग्निनियन्त्रकहरूको नियन्त्रण क्षमताभन्दा बाहिर पुगेको छ। स्पेनी प्रधानमन्त्री पेड्रो सान्चेजले प्रभावित क्षेत्रको स्थलगत निरीक्षण गर्ने कार्यक्रम तय गरेका छन्।

डढेलो नियन्त्रणका क्रममा उद्धार टोलीसमेत प्रभावित भएको छ। क्याप फेरेट क्षेत्रमा आगो निभाउने अभियानमा खटिएका करिब एक हजार अग्निनियन्त्रकमध्ये ४० जना घाइते भएका छन्। यसै साता फ्रान्स र इटालीमा डढेलो नियन्त्रणका क्रममा तीन अग्निनियन्त्रकको ज्यान गएको अधिकारीहरूले पुष्टि गरेका छन्।

फ्रान्स र स्पेनको आग्रहपछि युरोपेली आयोगले पनि सहयोग बढाएको छ। आयोगले फ्रान्सका लागि तीन र स्पेनका लागि चारवटा पानी बोक्ने विशेष अग्नि नियन्त्रण विमान परिचालन गरेको जनाएको छ।

डढेलोले वन क्षेत्रलाई पनि ठूलो क्षति पुर्‍याएको छ। फ्रान्समा हालसम्म १३ हजार ५०० हेक्टरभन्दा बढी वन तथा जमिन जलेको छ भने म्याड्रिड क्षेत्रमा करिब छ हजार हेक्टर भूभाग नष्ट भएको छ। स्पेनकै ग्वाडालाजारा क्षेत्रमा फैलिएको अर्को डढेलोले थप ३२ हजार हेक्टरभन्दा बढी क्षेत्र खरानी बनाएको छ।

वैज्ञानिकहरूले जलवायु परिवर्तनका कारण युरोपमा अत्यधिक गर्मी, खडेरी र तीव्र हावाको घटना बढ्दै गएको उल्लेख गर्दै यस्ता डढेलोको जोखिम आगामी वर्षहरूमा अझ बढ्न सक्ने चेतावनी दिएका छन्।

उनीहरूका अनुसार मानव गतिविधिबाट सिर्जित जलवायु परिवर्तनले युरोपमा प्राकृतिक विपद्को स्वरूपलाई थप जटिल बनाइरहेको छ।