काठमाडौं। नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठको निधन भएको छ। क्यान्सरको उपचारका क्रममा मंगलबार ललितपुरस्थित हेलिअस अस्पतालमा उनको निधन भएको हो।

पार्टीका कार्यवाहक मुख्यसचिव कृष्णप्रसाद दुलालले श्रेष्ठको निधन पुष्टि गर्दै बुधबार बिहान ८ बजेदेखि ११ बजेसम्म उनको पार्थिव शरीर श्रद्धाञ्जलीका लागि नेपाली कांग्रेसको केन्द्रीय कार्यालयमा राखिने जानकारी दिएका छन्।

स्याङ्जाबाट पटक–पटक प्रतिनिधिसभा सदस्य निर्वाचित भएका श्रेष्ठले भौतिक योजना तथा निर्माण, वन तथा भू–संरक्षण, उद्योग तथा शिक्षा मन्त्रीका रूपमा जिम्मेवारी सम्हालेका थिए। उनी उपप्रधानमन्त्री तथा कांग्रेस संसदीय दलका प्रमुख सचेतक पनि बनेका थिए। तत्कालीन नेपाली कांग्रेस (प्रजातान्त्रिक) का कार्यवाहक सभापतिको जिम्मेवारीसमेत उनले निर्वाह गरेका थिए।

२०१७ सालदेखि विद्यार्थी राजनीतिमार्फत प्रजातान्त्रिक आन्दोलनमा सक्रिय श्रेष्ठ २०३६ सालको जनमतसंग्रह, २०४२ सालको सत्याग्रह, २०४६ सालको जनआन्दोलन र २०६२–६३ को दोस्रो जनआन्दोलनमा अग्रपङ्क्तिमा सहभागी भएका थिए। लोकतन्त्र स्थापनाको आन्दोलन र शान्ति प्रक्रियामा पनि उनको उल्लेखनीय भूमिका रहेको मानिन्छ।

श्रेष्ठका तीन छोरा र छ छोरी छन्।