काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज बस्दै छ। बैठक बिहान ११ बजे वनस्थलीस्थित घण्टीघरमा रहेको पार्टीको केन्द्रीय कार्यालयमा बोलाइएको हो।

पार्टीका महामन्त्री विपिनकुमार आचार्यका अनुसार बैठकको मुख्य एजेन्डा हालै सम्पन्न महाधिवेशनको समग्र समीक्षा गर्ने रहेको छ। साथै, आवश्यक कार्यविधिको तर्जुमा तथा परिमार्जन, साङ्गठनिक व्यवस्थापन, विभिन्न पदमा मनोनयन तथा आगामी अभियान र कार्यक्रम सञ्चालनका विषयमा पनि विस्तृत छलफल गरिनेछ।

यसका अतिरिक्त समसामयिक तथा विविध साङ्गठनिक विषयहरूमा समेत बैठकले निर्णय गर्ने अपेक्षा गरिएको छ। रास्वपाले सबै केन्द्रीय समिति सदस्यलाई तोकिएको मिति, समय र स्थानमा अनिवार्य रूपमा उपस्थित हुन आग्रह गरेको छ।