काठमाडौं। राष्ट्रिय स्वतन्त्र पार्टी (रास्वपा)ले तीन जना मन्त्रीसहित ६ जनालाई केन्द्रीय सदस्यमा मनोनयन गरेको छ।

रास्वपा सभापति रवि लामिछानेले बुधबार पार्टीका तर्फबाट उनीहरूलाई केन्द्रीय सदस्यमा मनोनयन गरेका हुन्। मनोनीत हुनेमा शिक्षामन्त्री सस्मित पोखरेल, स्वास्थ्यमन्त्री निशा मेहता र कृषिमन्त्री गीता चौधरी रहेका छन्।

त्यस्तै, सांसद यज्ञमणि न्यौपाने तथा नेताहरू प्रमोद न्यौपाने र विनिता कठायतलाई पनि केन्द्रीय सदस्यमा मनोनयन गरिएको पार्टीले जनाएको छ।

मनोनीत भएका सबैलाई सभापति लामिछानेले पद तथा गोपनीयताको शपथ गराएका छन्।

पछिल्लो मनोनयनसँगै रास्वपाले सरकार सञ्चालनसँगै पार्टीको केन्द्रीय संरचनालाई थप विस्तार र व्यवस्थित गर्ने प्रक्रिया अघि बढाएको देखिएको छ।