काठमाडौं। प्रधानमन्त्री वालेन्द्र शाह (बालेन) र सभामुख डीपी अर्यालबीच बुधबार भेटवार्ता भएको छ।

प्रतिनिधिसभाको बैठक निरन्तर सञ्चालन हुनुअघि संसदको कामकारबाहीलाई प्रभावकारी, मर्यादित र परिणाममुखी बनाउने विषयमा दुई नेताबीच छलफल भएको हो।

सभामुखको सचिवालयका अनुसार संसदमा प्रतिनिधित्व गर्ने राजनीतिक दलका शीर्ष नेताहरूसँग संवाद गर्ने क्रममै सभामुख अर्यालले प्रधानमन्त्री शाहसँग भेट गरेका हुन्। भेटमा प्रतिनिधिसभाको बैठकको सञ्चालन, दलहरूबीच समन्वय र संसदलाई थप व्यवस्थित ढंगले अघि बढाउने विषयमा विचार आदानप्रदान भएको जनाइएको छ।

यसअघि बुधबार नै सभामुख अर्यालले नेकपा एमाले संसदीय दलका नेता रामबहादुर थापा ‘बादल’सँग पनि छुट्टै छलफल गरेका थिए।

मंगलबार उनले प्रमुख विपक्षी नेपाली कांग्रेस संसदीय दलका नेता भीष्मराज आङ्देम्बे तथा नेपाल कम्युनिस्ट पार्टीका नेता वर्षमान पुनसँग पनि छुट्टाछुट्टै भेटवार्ता गरेका थिए।

त्यसै दिन सभामुख अर्यालले विभिन्न राजनीतिक दलका प्रमुख सचेतक र सचेतकहरूसँग समेत छलफल गरी संसदको आगामी कार्यसूची, सञ्चालन र प्रभावकारिताका विषयमा सुझाव लिएका थिए।