काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछानेले सुनसरी घटनापछि मधेश प्रदेशमा विकसित सुरक्षा अवस्थाबारे पार्टीका सांसदहरूसँग छलफल गरेका छन्।

सुनसरीबाट सुरु भएको तनाव मधेशका विभिन्न जिल्लामा समेत फैलिन थालेपछि सभापति लामिछानेले बिहीबार मधेश प्रदेशबाट निर्वाचित करिब २० जना रास्वपा सांसदसँग भेटवार्ता गरेका हुन्। छलफलमा तराई–मधेशमा सामाजिक सद्भाव कायम राख्ने, सुरक्षा अवस्था सुदृढ बनाउने तथा सम्भावित तनाव नियन्त्रणका उपायबारे कुराकानी भएको उनको सचिवालयले जनाएको छ।

छलफलपछि सञ्चारकर्मीसँग कुरा गर्दै रास्वपा सांसद मनिष झाले मधेशको सुरक्षा अवस्थाप्रति पार्टीले गम्भीर चासो व्यक्त गरेको बताए। उनले सङ्घीय सरकार र सम्बन्धित निकायले आवश्यक संवेदनशीलता देखाउन नसकेको भन्दै त्यसबारे सभापति लामिछानेलाई जानकारी गराइएको बताए।

‘सुरक्षा संवेदनशीलताको अवस्थामा मधेश छ। मधेशलाई जसरी हेरिनुपर्ने हो, सङ्घीय सरकार वा सिंहदरबारको तर्फबाट त्यो स्तरको संवेदनशीलता देखिएको छैन भन्ने हाम्रो निष्कर्ष छ,’ झाले भने।

उनले जनकपुरधामको अवस्था पनि सामान्य नरहेको उल्लेख गर्दै बजार बन्द, चोक–चोकमा टायर बालेर भइरहेको प्रदर्शनजस्ता घटनाले स्थानीय जनजीवन प्रभावित भएको बताए।

‘सबै पसल बन्द छन्, बजार ठप्प छ। विभिन्न चोकमा टायर बालेर प्रदर्शन भइरहेको छ। यस्तो अवस्था कुनै पनि निर्वाचित जनप्रतिनिधिका लागि सुखद होइन,’ उनले भने।

सांसद झाले पछिल्ला घटनाक्रमले राज्यको सक्रियता र तत्परतामा कमी देखिएको महसुस भएको बताउँदै सामाजिक सद्भाव कायम राख्न सरकारले तत्काल प्रभावकारी कदम चाल्नुपर्ने आवश्यकता औंल्याए।