काठमाडौं। तराईका विभिन्न जिल्लामा पछिल्लो समय देखिएको तनावपूर्ण अवस्थाबीच प्रहरीले सामाजिक तथा साम्प्रदायिक सद्भावमा खलल पुर्‍याउने गतिविधिमा संलग्न भएको आरोपमा ६५ जनालाई पक्राउ गरेको छ।

नेपाल प्रहरीका अनुसार साउन १३ गतेदेखि शनिबार बिहान ९ बजेसम्म सात जिल्लाबाट उनीहरू पक्राउ परेका हुन्। पक्राउ पर्नेहरूको संख्या धनुषामा सबैभन्दा बढी छ। धनुषाबाट मात्रै ४५ जना प्रहरी नियन्त्रणमा परेका छन्।

त्यस्तै, सर्लाहीबाट ९ जना र सिरहाबाट ५ जना पक्राउ परेका छन्। महोत्तरी र सुनसरीबाट २–२ जना तथा पर्सा र सप्तरीबाट १–१ जनालाई नियन्त्रणमा लिइएको प्रहरीले जनाएको छ।

प्रहरी प्रधान कार्यालयका अनुसार पक्राउ परेकाहरूमाथि सामाजिक सुव्यवस्था तथा सद्भावमा असर पुर्‍याउने गतिविधिमा संलग्न भएको आरोपमा अनुसन्धान भइरहेको छ। अनुसन्धानका क्रममा कसुर पुष्टि भए सम्बन्धित कानुनअनुसार थप कारबाही अघि बढाइने प्रहरीले जनाएको छ।

तराईका केही जिल्लामा विरोध प्रदर्शन, तनाव र साम्प्रदायिक विवादका घटना देखिएपछि सुरक्षा निकायले निगरानी बढाएको छ। सम्भावित अप्रिय घटना रोक्न संवेदनशील क्षेत्रमा प्रहरी परिचालन गर्नुका साथै सामाजिक सद्भाव बिगार्ने गतिविधिमाथि निगरानी बढाइएको प्रहरीको भनाइ छ।

प्रहरीले सामाजिक सञ्जाल तथा अन्य माध्यमबाट फैलिने अपुष्ट सूचना, अफवाह र उत्तेजक सामग्रीका कारण परिस्थिति थप बिग्रन सक्ने भन्दै सर्वसाधारणलाई सचेत रहन आग्रह गरेको छ।

कुनै समुदायप्रति घृणा फैलाउने, द्वेष उत्पन्न गर्ने वा हिंसा भड्काउने गतिविधिबाट टाढा रहन आग्रह गर्दै प्रहरीले आपसी सद्भाव र सामाजिक एकता कायम राख्न सबै पक्षलाई अपिल गरेको छ।