काठमाडौं । नेसनल कलेजले यही  साउन २१ देखि २३ गते (अगस्ट ६–८, २०२६) सम्म इन्टरनेसनल कन्फरेन्स अन एप्लाइड साइकोलोजी (आईक्याप-२०२६) आयोजना गर्ने भएको छ।

‘व्यावहारिक विज्ञानको विकास : बहुविषयगत र अन्तरसांस्कृतिक दृष्टिकोण’ भन्ने मूल नारासहित हुने तीन दिने सम्मेलनमा विश्वका विभिन्न देशका मनोविद्, अनुसन्धाता, शिक्षक, नीति निर्माता र विज्ञहरूको सहभागिता रहने कलेजले जनाएको छ।

सम्मेलनको उदघाट काठमाडौं विश्वविद्यालयका उपकुलपति प्रा. डा. ऋषिकेश वाग्लेले गर्ने छन् ।

सम्मेलनमा मानसिक स्वास्थ्य, शिक्षा, कार्यस्थलको मानसिक सुदृढता, सामुदायिक उत्थान, सार्वजनिक नीति, दिगो विकास तथा समसामयिक मनोसामाजिक चुनौतीबारे बहस हुनेछ ।

सम्मेलनका संयोजक तथा नेसनल कलेजका प्रिन्सिपल माधवप्रसाद न्यौपानेले आजको बदलिँदो विश्वमा जटिल सामाजिक समस्याको समाधानका लागि मनोवैज्ञानिक काेणबाट बहस र अन्तरसांस्कृतिक संवाद आवश्यक रहेको बताए।

उनले आईक्याप-२०२६ ले मानसिक स्वास्थ्य, सामुदायिक उत्थान र दिगो विकासलाई सहयोग पुग्ने तथा सांस्कृतिक रूपमा उपयुक्त अनुसन्धान र अभ्यासलाई अन्तर्राष्ट्रिय स्तरमा जोड्ने विश्वास व्यक्त गरे।

सम्मेलनमा नेपालसहित अमेरिका, बेलायत, क्यानडा, स्पेन, अर्जेन्टिना, भारत, बंगलादेश, हङकङ, मलेसिया, श्रीलंका, थाइल्यान्ड, इथियोपिया, ओमान, अजरबैजान, कम्बोडिया, इन्डोनेसिया, नेदरल्यान्ड्सलगायत देशका सहभागी प्रत्यक्ष तथा अनलाइन माध्यमबाट जोडिनेछन्।

सम्मेलनका समन्वय सचिव डा. नरेन्द्रसिंह ठगुन्नाले सम्मेलनमा अनुसन्धानपत्रहरू प्रस्तुत हुने जानकारी दिए।

उनका अनुसार क्लिनिकल तथा काउन्सेलिङ मनोविज्ञान, स्नायुविज्ञान, संगठनात्मक मनोविज्ञान, शैक्षिक मनोविज्ञान, कृत्रिम बुद्धिमत्ता र मानसिक स्वास्थ्य, खेल मनोविज्ञान, बौद्ध मनोविज्ञान तथा विपद् व्यवस्थापनलगायत विषयमा अनुसन्धान प्रस्तुत गरिनेछ।

सम्मेलनमा प्रसिद्ध मनोविद्हरूको विशेष व्याख्यान, प्यानल छलफल, कार्यशाला तथा अन्तरक्रियात्मक प्रस्तुति पनि रहने आयोजकले जनाएको छ।

नेसनल कलेजका भाइस प्रिन्सिपल छत्र कार्कीले सम्मेलनमा प्रस्तुत उत्कृष्ट अनुसन्धानपत्रहरू काठमाडौं विश्वविद्यालयको ‘बोधी : एन इन्टरडिसिप्लिनरी जर्नल’, नेसनल कलेजको ‘समृद्धि जर्नल अफ डेभलपमेन्ट स्टडिज’ तथा सम्पादित पुस्तकमा प्रकाशन गरिने जानकारी दिए।

उनले सम्मेलनबाट उत्पादन हुने अनुसन्धानले नेपालसहित अन्तर्राष्ट्रिय स्तरमा शिक्षा, नीति निर्माण, अनुसन्धान र व्यावहारिक अभ्यासमा योगदान पुग्ने विश्वास व्यक्त गरे।

काठमाडौं विश्वविद्यालयसँग आबद्ध नेसनल कलेज विकास अध्ययन, वित्त, अन्तर्राष्ट्रिय सम्बन्ध र सार्वजनिक नीतिका क्षेत्रमा अध्यापन तथा अनुसन्धान गर्दै आएको शैक्षिक संस्था हो।