काठमाडौं। संयुक्त राष्ट्रसंघीय बालकोष (युनिसेफ)ले गाजा पट्टीमा युद्धविराम लागू भएयता ३०० दिनको अवधिमा कम्तीमा ३०० बालबालिकाको मृत्यु भएको जनाएको छ।

युनिसेफका अनुसार युद्धविराम कायम रहेको भनिएको अवधिमा पनि गाजामा दैनिक औसतमा एक जना बालबालिकाको ज्यान गएको छ। मध्यपूर्व तथा उत्तर अफ्रिकाका लागि युनिसेफका क्षेत्रीय निर्देशक एडवर्ड बेगबेडरले उक्त अवधिमा सयौँ बालबालिका घाइते भएको र तीमध्ये धेरैको अवस्था गम्भीर रहेको बताएका छन्।

बेगबेडरले गाजाका बालबालिका अझै पनि हिंसा अन्त्य हुने प्रतीक्षामा रहेको बताएका छन्। युद्धविरामका बाबजुद बालबालिकाको मृत्यु र घाइते हुने क्रम नरोकिएको भन्दै उनले उनीहरूको सुरक्षा सुनिश्चित गर्न तत्काल कदम चाल्नुपर्नेमा जोड दिएका छन्।

युनिसेफका अनुसार गाजामा रहेका परिवारहरू अहिले गाजा पट्टीको करिब एक तिहाइ भूभागमा सीमित भएका छन्। उनीहरू क्षतिग्रस्त भवन, भग्नावशेष तथा ठोस फोहोर जम्मा भएका असुरक्षित क्षेत्रमा बस्न बाध्य छन्।

युद्धका कारण बालबालिकाको स्वास्थ्य तथा दैनिक जीवनसमेत गम्भीर रूपमा प्रभावित भएको युनिसेफले जनाएको छ। गाजाभरिका बालबालिकाले तीव्र कुपोषण, विभिन्न रोग, सुरक्षित पिउने पानीको अभाव तथा क्षतिग्रस्त सरसफाइ प्रणालीको समस्या झेलिरहेका छन्।

युनिसेफले बालबालिकाको अवस्थालाई थप गम्भीर हुन नदिन सबै सम्बन्धित पक्षलाई अन्तर्राष्ट्रिय मानवीय कानुन तथा अन्तर्राष्ट्रिय कानुनअन्तर्गतका दायित्व पालना गर्न आह्वान गरेको छ।

एजेन्सीले बालबालिकाको सुरक्षा सुनिश्चित गर्न, स्वास्थ्य सेवा, शिक्षा, सुरक्षित पिउने पानी तथा खाद्यान्नजस्ता अत्यावश्यक वस्तु र सेवामा उनीहरूको पहुँच कायम गर्न आग्रह गरेको छ।

त्यसैगरी, समस्यामा परेका बालबालिकासम्म सुरक्षित, द्रुत र निर्बाध रूपमा मानवीय सहायता पुर्‍याउने व्यवस्था गर्नुपर्नेमा पनि युनिसेफले जोड दिएको छ।

युनिसेफले युद्धविरामको अवधिमा समेत बालबालिकाको मृत्यु भइरहनुले गाजाको मानवीय संकट अझै गम्भीर अवस्थामा रहेको देखाएको जनाएको छ। बालबालिकालाई हिंसाबाट जोगाउँदै उनीहरूको आधारभूत आवश्यकता पूरा गर्न तत्काल र प्रभावकारी मानवीय सहयोग आवश्यक रहेको एजेन्सीको भनाइ छ।