काठमाडौं। राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले मुलुकमा आम नागरिक, निजी क्षेत्र तथा व्यवसायीहरू असुरक्षित र आतंकित अवस्थामा रहेको दाबी गरेका छन्।

शनिबार राप्रपाको काठमाडौं महानगरपालिका नगर अधिवेशनलाई सम्बोधन गर्दै लिङदेनले दैनिक ज्याला मजदुरी गरेर परिवार पालिरहेका नागरिकदेखि छोराछोरीको भविष्य सुरक्षित बनाउने उद्देश्यले मेहनत गरिरहेका मानिससम्म निराश र असुरक्षित बनेको बताए।

उनले पछिल्लो निर्वाचनमा नयाँ राजनीतिक दललाई मत दिएका नागरिकसमेत अहिले निराश र आतंकित भएको दाबी गरे। उनका अनुसार नागरिकले परिवर्तनको अपेक्षासहित नयाँ शक्तिलाई मत दिए पनि त्यसअनुसारको अवस्था सिर्जना हुन सकेको छैन।

लिङदेनले महँगी बढेको, बजारमा कृत्रिम अभाव सिर्जना भएको तथा निजी क्षेत्र निराश रहेको आरोप लगाए। आर्थिक गतिविधिमा देखिएको असहज अवस्थाले व्यवसायी तथा सर्वसाधारण दुवै प्रभावित भएको उनको भनाइ थियो।

उनले देश गम्भीर भू–राजनीतिक चक्रव्यूहमा फसेको दाबी गर्दै राष्ट्रिय हितका विषयमा स्पष्ट रूपमा बोल्ने राजनीतिक शक्ति अभाव भएको बताए।

‘मुलुक भू–राजनीतिको गम्भीर चक्रव्यूहमा फसेको छ। कसैले बोल्न सकिरहेका छैनन्। जनता वा देशका लागि हामी छौँ भनेर भन्न सक्ने कुनै राजनीतिक शक्ति देखिरहेको छैन,’ उनले भने।

लिङदेनले मुलुकलाई संकटबाट बाहिर निकाल्न राप्रपा थप बलियो बन्नुपर्ने बताए। त्यसका लागि पार्टीले नयाँ ढंग, नयाँ सोच र नयाँ दृष्टिकोणसहित जनतामाझ जानुपर्ने उनको भनाइ थियो।

उनले राप्रपाले अघि सारेको राजनीतिक विचार र बाटो समयक्रममा सही साबित हुँदै गएको दाबी गरे। अहिले पार्टीका नेता तथा कार्यकर्ता निराश भएर पछि हट्ने नभई संगठनलाई थप सुदृढ बनाएर अघि बढ्ने समय भएको उनले बताए।

‘राष्ट्रिय प्रजातन्त्र पार्टीले लिएको विचार, बाटो अनिवार्य जस्तो प्रमाणित हुँदै गएको छ। यस्तो बेला मैदानबाट भाग्ने होइन, मैदान छाडेर लुक्ने होइन,’ लिङदेनले भने, ‘सबै एकताबद्ध भएर अगाडि बढ्ने समय हो।’

उनले पार्टीका नेता तथा कार्यकर्तालाई आपसी एकता कायम गर्दै राप्रपाको संगठन विस्तार र राजनीतिक गतिविधिलाई थप प्रभावकारी बनाउन आग्रह गरे।

मुलुकको वर्तमान संकटपूर्ण अवस्थालाई राप्रपाले आफ्नो राजनीतिक विचार स्थापित गर्ने अवसरका रूपमा उपयोग गर्नुपर्ने उनको धारणा थियो।