काठमाडौं । नेपाली कांग्रेसकी प्रतिनिधिसभा सदस्य रिना उप्रेतीले हिमगंगा पूर्वविद्यार्थी समाजले विद्यालयको हितसँगै लिखुपिकेको समग्र शैक्षिक उन्नयनका लागि काम गर्नुपर्ने बताएकी छन्।

हिमगंगा पूर्वविद्यार्थी समाज, नेपालको तेस्रो वार्षिक साधारणसभा तथा प्रथम अधिवेशनलाई सम्बोधन गर्दै सांसद उप्रेतीले समाजको नेतृत्वमा जो आए पनि हिमगंगा माध्यमिक विद्यालयको हकहित र विकासलाई प्राथमिकतामा राखेर काम गर्न आग्रह गरिन्।

उनले पूर्वविद्यार्थी समाजमार्फत आपसी आत्मीयता र सहकार्य बढाउँदै विद्यालय तथा समुदायको विकासमा योगदान पुग्ने विश्वास व्यक्त गरिन्।

‘हिमगंगा विद्यार्थी समाजको अध्यक्ष जो भए पनि विद्यालयको हक र हितका लागि काम गर्नुहोला,’ उनले भनिन्, ‘हिमगंगा विद्यार्थी समाजमार्फत आत्मीयता बढाउँदै सहयोग गर्छ भन्ने विश्वास गरेको छु।’

सांसद उप्रेतीले समाजले हिमगंगा माध्यमिक विद्यालयको विकासमा मात्र सीमित नभई लिखुपिकेको समग्र शैक्षिक उन्नयनका लागि समेत प्रभावकारी भूमिका निर्वाह गर्नुपर्नेमा जोड दिइन्।

त्यस्तै, उनले देश तथा विदेशमा रहेका सम्पूर्ण लिखुपिकेवासीलाई एउटै सञ्जालमा जोडेर समाजको विकासमा उनीहरूको ज्ञान, सीप र अनुभव उपयोग गर्नुपर्ने धारणा राखिन्।