काठमाडौं। हिमगंगा पूर्वविद्यार्थी समाजका अध्यक्ष भरतबहादुर बस्नेतले समाजलाई थप सुदृढ बनाउँदै विद्यालयको शैक्षिक विकास र लिखुपिकेको सामाजिक रूपान्तरणमा योगदान गर्ने बताएका छन्।

हिमगंगा पूर्वविद्यार्थी समाज, नेपालको तेस्रो वार्षिक साधारणसभा तथा प्रथम अधिवेशनलाई सम्बोधन गर्दै अध्यक्ष बस्नेतले समाज विश्वासको जगमा उभिएको बताए। स्रोतसाधनको सीमितताका बाबजुद छोटो समयमै समाजले महत्वपूर्ण उपलब्धि हासिल गरेको उनको भनाइ छ।

उनले समाजले विद्यालयमा अध्ययनरत विद्यार्थीलाई छात्रवृत्ति प्रदान गर्नुका साथै कम्प्युटर तथा ल्यापटप उपलब्ध गराउँदै आएको जानकारी दिए। आगामी दिनमा पनि यस्ता कार्यक्रमलाई निरन्तरता दिने उनले प्रतिबद्धता जनाए।

‘समाजको अध्यक्षका रूपमा यहाँ उपस्थित हुन पाउँदा मैले गर्व गरेको छु। यो समाज विश्वासको जगमा उभिएको छ,’ बस्नेतले भने, ‘स्रोतसाधन नहुँदा पनि यो समाजले छोटो समयमा ठूला उपलब्धि हासिल गरेको छ।’

बस्नेतले समाजको अक्षयकोषलाई थप सुदृढ बनाउन आवश्यक रहेको बताए। विद्यालयमा प्रविधिको विस्तारका लागि समेत समाजले निरन्तर काम गर्ने उनको भनाइ छ।

उनले हिमगंगा माध्यमिक विद्यालयमा अध्ययन गरेका देश तथा विदेशमा रहेका सम्पूर्ण पूर्वविद्यार्थीलाई एउटै सञ्जालमा जोड्ने योजना रहेको बताए। पूर्वविद्यार्थीको ज्ञान, सीप र स्रोतलाई विद्यालय तथा समुदायको विकासमा उपयोग गर्ने उद्देश्य रहेको उनले स्पष्ट पारे।

अध्यक्ष बस्नेतले हिमगंगा पूर्वविद्यार्थी समाजको मुख्य उद्देश्य सामाजिक परिवर्तन र लिखुपिकेको समृद्धि रहेको बताए।

‘हाम्रो यो समाजको उद्देश्य भनेको सामाजिक परिवर्तन हो। हामी लिखुपिकेको समृद्धि चाहन्छौँ,’ उनले भने।