काठमाडौं । राष्ट्रिय स्वतन्त्र पार्टी (रास्वपा)का महामन्त्री विपिनकुमार आचार्यले संसद्को वर्तमान अभ्यासलाई सुधार गर्न ‘संसदीय सुधार समिति’ गठन गर्न माग गरेका छन्।

सोमबार प्रतिनिधिसभाको शून्य समयमा बोल्दै आचार्यले संसदीय अभ्यास अपेक्षाअनुसार प्रभावकारी हुन नसकेको भन्दै यसको समीक्षा र सुधारका लागि सभामुखको ध्यानाकर्षण गराएका हुन्।

उनले अहिलेको संसदीय अभ्यास ‘कर्मकाण्डी’ बन्दै गएको धारणा राख्दै संसद्ले सांसदहरूको क्षमता र भूमिकालाई पर्याप्त रूपमा उपयोग गर्न सकेको छ कि छैन भन्ने विषयमा सबै सांसदबीच सर्वेक्षण गर्नुपर्ने बताए।

‘एक पटक सबै सांसदहरूबीच सर्वेक्षण (पोलिङ) गर्नुपर्छ । के हामी सबै सांसदहरू अहिलेको संसदीय अभ्यासबाट खुसी छौँ त ? के हाम्रो क्षमतालाई अहिलेको संसदीय अभ्यासले सदुपयोग गरेको छ त ? यदि छ भने त मलाई समस्या छैन,’ उनले भने।

आचार्यले अहिलेको अभ्यासबाट धेरै सांसद असन्तुष्ट रहेको आफ्नो बुझाइ रहेको बताए। त्यस्तो अवस्था भए संसद्को कार्यशैली र अभ्यास सुधारका लागि सबै सांसद मिलेर अघि बढ्नुपर्ने उनको धारणा छ।

‘मेरो जस्तै बुझाइ धेरै सांसदहरूको पनि हो भने यो संसदीय अभ्यास सुधारका लागि सबैले मिलेर काम गर्नुपर्छ,’ उनले भने।

संसद्लाई थप सिर्जनशील, उपयोगी र प्रभावकारी बनाउने विषयमा अध्ययन तथा सुझाव दिन छुट्टै समिति गठन गर्नुपर्ने प्रस्ताव उनले अघि सारे।

‘मिल्छ कि मिल्दैन मलाई थाहा छैन, तर एउटा संसदीय सुधार समिति बनाएर अहिलेको यो संसद्लाई कसरी बढी सिर्जनशील, उपयोगी र प्रभावकारी बनाउने भन्ने दिशामा एकपटक काम गर्नुपर्छ जस्तो लाग्छ,’ आचार्यले भने।

उनले आफ्नो प्रस्तावका सम्बन्धमा सभामुखको ध्यानाकर्षण गराउँदै संसदीय अभ्यासमा सुधारका लागि संस्थागत पहल आवश्यक रहेको बताए।