काठमाडौं। त्रिभुवन अन्तर्राष्ट्रिय विमानस्थलबाट नेपाल वायुसेवा निगमका दुई कर्मचारी पक्राउ परेका छन्।

तोकिएको सीमाभन्दा बढी विदेशी मुद्रा लिएर मलेसिया जान लागेको अवस्थामा उनीहरूलाई पक्राउ गरिएको प्रहरीले जनाएको छ।

पक्राउ पर्नेमा काठमाडौं-२६ की ५४ वर्षीया जननी बज्राचार्य र गोरखा नगरपालिका–३ की ३५ वर्षीया ममता पाण्डे रहेका छन्। उनीहरूलाई आइतबार साँझ विमानस्थलबाट पक्राउ गरिएको विमानस्थल सुरक्षा कार्यालयका प्रहरी उपरीक्षक राजकुमार सिलवालले जानकारी दिएका छन्।

प्रहरीका अनुसार राष्ट्र बैंकको प्रचलित मापदण्डले तोकेको सीमाभन्दा बढी विदेशी मुद्रा उनीहरूको साथबाट फेला परेको हो। नेपालबाट विदेश लैजान पाउने विदेशी मुद्राको सीमासम्बन्धी व्यवस्था उल्लंघन गरेको आशंकामा उनीहरूलाई नियन्त्रणमा लिइएको प्रहरीले जनाएको छ।

बज्राचार्यको साथबाट १२ हजार ३७२ मलेसियन रिंगेट र ४ हजार ३०० अमेरिकी डलर बरामद भएको प्रहरीले जनाएको छ। यस्तै, पाण्डेको साथबाट १२ हजार ३२८ मलेसियन रिंगेट र ४ हजार २०० अमेरिकी डलर फेला परेको छ।

दुवै जना नेपाल वायुसेवा निगमका कर्मचारी रहेको खुलेको छ। प्रहरीले बरामद विदेशी मुद्रासहित उनीहरूमाथि आवश्यक अनुसन्धान अघि बढाएको जनाएको छ।