काठमाडौं । भोटेकोशी हुँदै आएको भीषण बाढीले नुवाकोटको त्रिशूली बजार र आसपासका बस्तीमा ठूलो भौतिक क्षति पुर्‍याएको छ । बाढीले केही बस्ती नै बगाएको प्रारम्भिक जानकारी आएको छ ।

बाढीबाट मानवीय क्षति कति भयो भन्ने यकिन विवरण भने आइसकेको छैन । क्षतिको विवरण संकलन तथा प्रभावितको खोजी भइरहेको छ ।

उद्धार तथा राहतका लागि स्थानीय तहले सम्बन्धित निकायसँग समन्वय गरिरहेको छ । नेपाली सेना, नेपाल प्रहरी र सशस्त्र प्रहरीको टोली प्रभावित क्षेत्रमा परिचालन गरिएको छ ।

उद्धार कार्यका लागि नेपाली सेनाको हेलिकप्टरसमेत परिचालन गरिएको जनाइएको छ । प्रभावित क्षेत्रमा फसेका नागरिकको खोजी तथा उद्धारलाई प्राथमिकता दिइएको छ ।

बाढीको जोखिम कायमै रहेकाले त्रिशूली नदी आसपासका बस्तीमा रहेका नागरिकलाई उच्च सतर्कता अपनाउन र सुरक्षित स्थानमा जान आग्रह गरिएको छ ।