जनकपुरधाम । रसुवाको भोटेकोशी र त्रिशूली नदीमा आएको भीषण बाढीको असर कोशी नदीमा समेत देखिन थालेको छ।

कोशी नदीको जलसतह बढ्दै गएपछि सुनसरी र सप्तरीका तटीय क्षेत्रमा सतर्कता अपनाउन आग्रह गरिएको छ ।

भोटेकोशी तथा त्रिशूली नदी हुँदै आएको बाढीका कारण कोशी नदीमा पानीको बहाव बढिरहेको हो । कोशी ब्यारेजको पछिल्लो विवरणअनुसार नदीमा पानीको बहाव १ लाख ३१ हजार ३४० क्युसेक पुगेको छ । बहाव निरन्तर बढिरहेको जनाइएको छ ।

पानीको बहाव बढेपछि कोशी ब्यारेजका १५ वटा ढोका खोलिएका छन् । ब्यारेजको विवरणमा नदीको अवस्था खतरा तहमा पुगेको उल्लेख छ ।

यसअघि तिब्बती क्षेत्रबाट भोटेकोशी नदीमा ठूलो बाढी प्रवेश गरेपछि रसुवा, नुवाकोट, धादिङ र चितवनलगायत तल्लो तटीय क्षेत्रमा जोखिम बढेको थियो । भोटेकोशी र त्रिशूली नदी आसपासका बस्ती तथा बजार क्षेत्रमा उच्च सतर्कता अपनाउन आग्रह गरिएको छ ।

बाढीको प्रभाव तल्लो तटीय क्षेत्रमा समेत बढ्न सक्ने भएकाले कोशी नदी आसपासका बासिन्दालाई समेत सावधानी अपनाउन भनिएको छ । जोखिम बढे तत्काल सुरक्षित स्थानतर्फ जान र नदी तथा खोलाको किनारमा नजान सम्बन्धित निकायले आग्रह गरेका छन् ।

यस्तै, सम्भावित जोखिमलाई मध्यनजर गर्दै खोज तथा उद्धारमा खटिने निकायलाई तयारी अवस्थामा रहन भनिएको छ ।

कोशी नदीको बहाव अझै बढ्न सक्ने भएकाले सुनसरी, सप्तरीलगायत कोशी तटीय क्षेत्रका बासिन्दालाई विशेष सतर्कता अपनाउन आग्रह गरिएको छ ।