रूपन्देही। भोटेकोशी हुँदै आएको बाढीको असर नारायणी नदीमा समेत पर्न सक्ने भएपछि नवलपरासीको सुस्ता गाउँ खाली गराउन थालिएको छ ।

बाढीको जोखिमलाई मध्यनजर गर्दै सुस्ताका स्थानीयलाई नदीवारि रामनगरस्थित शिव गंगाकुञ्ज प्राथमिक विद्यालयमा सारिएको प्रमुख जिल्ला अधिकारी दीपकराज नेपालले जानकारी दिए ।

प्रशासनका अनुसार सुस्तामा रहेका स्थानीयलाई घरका आवश्यक सामान सुरक्षित तथा अग्लो स्थानमा राख्न लगाएर सुरक्षित ठाउँमा सारिएको हो । स्थानीयको उद्धार तथा स्थानान्तरणमा नेपाली सेना, नेपाल प्रहरी र सशस्त्र प्रहरी परिचालन गरिएको छ ।

स्थानीयलाई सुरक्षित स्थानमा सारेपछि सुरक्षाकर्मीका कार्यालयसमेत जोखिमअनुसार सुरक्षित ठाउँमा सारिने तयारी रहेको प्रजिअ नेपालले बताए ।

सुस्तासँगै नारायणी नदी किनारका प्रतापपुर तथा सुस्ता गाउँपालिकाका अन्य बस्तीमा समेत बाढी पस्न सक्ने जोखिम रहेको प्रशासनले जनाएको छ ।

नदीको बहाव बढ्न सक्ने भएकाले तटीय क्षेत्रका बासिन्दालाई सतर्क रहन र जोखिम देखिए तत्काल सुरक्षित स्थानमा जान आग्रह गरिएको छ ।