त्रिशूली, ढुंगेबजार र देवीघाट आसपासका बस्तीमा बाढीले ठूलो क्षति गरेको छ। कतिपय घरका संरचना बाँकी रहे पनि जग कटानमा परेकाले जोखिमपूर्ण अवस्थामा छन्। कतिपय स्थानमा भने घर तथा अन्य संरचना बाढीले बगाएर बगर मात्रै बाँकी छ।

बाढीको चपेटामा जलविद्युत् आयोजनाका संरचना समेत परेका छन्। आयोजनामा क्षति पुगेपछि नुवाकोटका विभिन्न क्षेत्रमा विद्युत् आपूर्ति अवरुद्ध भएको छ। विद्युत् सेवा बन्द हुँदा बाढी प्रभावितको दैनिक जीवन थप कष्टकर बनेको छ।

बाढीका कारण सडक तथा स्थलमार्ग अवरुद्ध भएपछि प्रभावितको उद्धारका लागि हवाई माध्यम प्रयोग गरिएको छ। विदुर नगरपालिका–४ दम्कीस्थित नेपाली सेनाको मैथली ब्यारेकलाई उद्धारको मुख्य केन्द्र बनाएर सेनाले एक दर्जनभन्दा बढी हेलिकप्टर परिचालन गरेको छ।

हेलिकप्टरमार्फत जोखिममा रहेका तथा विभिन्न स्थानमा फसेका नागरिकलाई सुरक्षित ठाउँमा सार्ने काम भइरहेको छ।

बाढीका कारण नुवाकोटमा मात्रै करिब १ हजार ५०० परिवार विस्थापित भएको प्रमुख जिल्ला अधिकारी शम्भुप्रसाद रेग्मीले जानकारी दिएका छन्।

घर तथा सम्पत्ति गुमाएका परिवार अहिले सुरक्षित बसोबास र राहतको पर्खाइमा छन्। प्रभावित क्षेत्रमा उद्धारसँगै राहत र पुनःस्थापनाको चुनौती पनि थपिएको छ।