काठमाडौं । नेपालमा आएको भीषण बाढीपछि नदीमा बगेका मानिसका शव भारतको गण्डक (नारायणी) नदीसम्म पुगेका छन्। भारतको उत्तर प्रदेशअन्तर्गत महराजगंजमा चार र कुशीनगरमा तीन गरी सातवटा शव फेला परेका हुन्।

भारतीय अधिकारीका अनुसार भेटिएका शवमध्ये पाँच महिला र दुई पुरुषका छन्। गण्डक नदीमा निगरानी गरिरहेका सशस्त्र सीमा बल (एसएसबी) का उद्धार टोलीले शवहरू बगिरहेको अवस्थामा देखेपछि मोटरबोटको प्रयोग गरेर नदीबाट बाहिर निकालेका थिए।

महराजगंजमा फेला परेका चार शवमध्ये तीन महिला र एक पुरुषको रहेको निचलौल तहसीलका उपजिल्लाधिकारी सिद्धार्थ गुप्ताले बताएका छन्। उनका अनुसार नदीको बहाव माथिल्लो क्षेत्र अर्थात् नेपालतर्फबाट आएकाले ती शव नेपालमा आएको बाढीमा बगेको हुन सक्ने सम्भावना बलियो छ।

कुशीनगरमा भेटिएका तीन शवमा दुई महिला र एक पुरुष छन्। शवलाई सुरक्षित राख्न फ्रिजरमा राखिएको र पहिचानको प्रक्रिया अघि बढाइएको कुशीनगरका अतिरिक्त प्रहरी उपरीक्षक सिद्धार्थ वर्माले बताएका छन्।

शवको सनाखत तथा आफन्तको खोजीका लागि महराजगंज र कुशीनगर प्रशासनले नेपालका सम्बन्धित निकायसँग सम्पर्क र समन्वय गरिरहेको छ। भारतीय सुरक्षा तथा उद्धार टोलीले गण्डक नदी र आसपासका क्षेत्रमा निगरानीसमेत बढाएका छन्।

महराजगंज क्षेत्रमा एसडीआरएफ, आरआरटी र एसएसबीका टोली परिचालन गरेर नदी किनार तथा बहाव क्षेत्रमा निरन्तर निगरानी भइरहेको भारतीय प्रशासनले जनाएको छ।

नेपालमा बाढीका कारण ठूलो मानवीय क्षति भएको र नदीको बहाव तीव्र रहेकाले आगामी दिनमा थप शव भारतीय भूभागतर्फ बगेर आउन सक्ने सम्भावनाबारे समेत अधिकारीहरूले सतर्कता अपनाएका छन्।

भारतीय प्रशासनले नेपालतर्फका सम्बन्धित निकायसँग समन्वय गरी फेला परेका शवको पहिचान गर्ने तथा सम्भावित आफन्तसम्म सूचना पुर्‍याउने प्रक्रिया अघि बढाएको छ।