प्राप्त नामावलीअनुसार सम्पर्कविहीन हुनेमा १२७ जना नेपालीसहित विभिन्न देशका नागरिक रहेका छन्। तीमध्ये भारतीय नागरिकको संख्या सबैभन्दा धेरै १७८ रहेको बताइएको छ।

कैलाश मानसरोवर यात्राका लागि विभिन्न ट्राभल्स कम्पनीमार्फत रसुवा पुगेका यात्रुहरू बाढीपछि सम्पर्कविहीन भएका हुन्। उनीहरूको अवस्थाबारे यकिन जानकारी लिन सम्बन्धित निकायले खोजी तथा समन्वयको काम अघि बढाइरहेका छन्।

बालुवाटारस्थित ऋचा टुर्स एण्ड ट्राभल्समार्फत कैलाश मानसरोवर यात्रामा गएका ६८ जना पनि सम्पर्कविहीन रहेको जानकारी प्राप्त भएको छ। तीमध्ये जी इन्टरटेन इन्टरप्राइजेजका पूर्वप्रमुख कार्यकारी अधिकृत अतुल दास र उनकी पत्नी पायल दाससमेत रहेको बताइएको छ।

ऋचा टुर्स एण्ड ट्राभल्सका समीर गाइजुका अनुसार उक्त समूहमा ६१ जना भारतीय नागरिक, सात जना गैरआवासीय भारतीय (एनआरआई) तथा १८ जना ट्रेक्सका कर्मचारीसमेत सम्पर्कविहीन छन्। यात्रुहरू बाढी आउनुअघि रसुवाको टिमुरे क्षेत्रमा रहेको बताइएको छ।

उनीहरू टिमुरेस्थित याङ्गिला होटल एण्ड लजमा बसेका थिए। बुधबार बिहान करिब ८ बजेसम्म उनीहरू सम्पर्कमा रहेको र त्यसपछि भने कुनै जानकारी प्राप्त हुन नसकेको जनाइएको छ।

त्यस समयमा यात्रुहरूले टिमुरेमा अध्यागमनसम्बन्धी पासको प्रक्रिया अघि बढाइरहेको जानकारी गराएका थिए। त्यसपछि भोटेकोशी क्षेत्रमा आएको बाढी र पहिरोका कारण नेपाल–चीन सीमावर्ती क्षेत्रमा आवागमन तथा सञ्चार सम्पर्क प्रभावित भएपछि उनीहरूसँग सम्पर्क टुटेको बताइएको छ।

बाढीका कारण रसुवाको टिमुरे, केरुङ नाका आसपास तथा सीमावर्ती क्षेत्रमा ठूलो क्षति पुगेको छ। सडक तथा पुललगायतका पूर्वाधारमा क्षति पुगेपछि यात्रुहरूको खोजी तथा उद्धारमा समेत कठिनाइ भइरहेको छ।

सम्पर्कविहीन यात्रुहरूको विवरण संकलन तथा अवस्थाबारे जानकारी लिन सम्बन्धित नेपाली निकाय, ट्राभल्स कम्पनी र विदेशी दूतावासहरूबीच समन्वय भइरहेको छ।

यसबीच बेपत्ता यात्रुहरू सुरक्षित रहेको वा उनीहरूलाई उद्धार गरिएकोबारे आधिकारिक विवरणको प्रतीक्षा भइरहेको छ।