नुवाकोट। प्रमुख प्रतिपक्षी नेता भीष्मराज आङ्देम्बेले गृहमन्त्री सुधन गुरूङलाई बाढी प्रभावित नागरिकको उद्धार कार्य तीव्र पार्न सुझाव दिएका छन्।

नुवाकोटको बट्टारस्थित नेपाली सेनाको मैथिली ब्यारेकमा गृहमन्त्री गुरूङसँग शुक्रबार मध्याह्न भेट गर्दै आङ्देम्बेले रसुवा, नुवाकोट र धादिङका थुप्रै बाढी प्रभावित नागरिक अभरमा परेको खबर प्राप्त भएको भन्दै पूर्ण क्षमतासहित उद्धारमा केन्द्रित हुनुपर्नेमा जोड दिए।

‘विभिन्न ठाउँबाट उद्धारका लागि याचना भइरहेको छ,’ उनले गृहमन्त्री गुरूङलाई भने, ‘सरकार पूरै उद्धारमै केन्द्रित होस् । हामी पनि सक्दो सहयोग गर्छौं।’

नेता आङ्देम्बेले प्रधानमन्त्री बालेन्द्र शाहलाई पनि आवश्यक उद्धार कार्यलाई प्राथमिकता दिन आग्रह गर्ने बताए।

‘म प्रधानमन्त्रीजीलाई पनि भन्नुपर्ने भन्छु,’ उनले भने, ‘यो विपद्मा हामी सबैको पहिलो दायित्व बाँचेकाको छिटो उद्धार गर्नु नै हो।’

उनका अनुसार रसुवाको स्याप्रुवेशी, टिमुरे, धुञ्चे तथा नुवाकोटको कोलोनी, विदुर नगरपालिकाका वडा नम्बर १, ४ र १० लगायत क्षेत्रमा थुप्रै नागरिक फसेका छन्। उनीहरूको हवाई उद्धार आवश्यक भएकाले ढिलाइ गर्न नहुने उनले बताए।

उनले उद्धार नै पहिलो प्राथमिकता हुनुपर्ने भन्दै अनावश्यक रूपमा पटकपटक जिल्ला विपद् व्यवस्थापन समितिको बैठक राख्न नहुने बताए।

कांग्रेसकै अर्का सांसद टेकबहादुर गुरूङले बाढी प्रभावित क्षेत्रका सडक अवरुद्ध भएकाले शीघ्र पुनर्निर्माण गरी उद्धार कार्य प्रभावकारी बनाउनुपर्नेमा जोड दिए।

स्थलगत निरीक्षणमा कांग्रेस संसदीय दलका प्रमुख सचेतक बासना थापा, सांसदहरू खडकबहादुर बुढा र डा. शाहजान खातुन तथा कांग्रेस नुवाकोट सभापति रमेश महत गएका थिए।

उनीहरूले नुवाकोटको विदुर नगरपालिकास्थित ढुङ्गे बजार, देवीघाटलगायत बाढी प्रभावित क्षेत्रको स्थलगत निरीक्षण गरेका थिए।