काठमाडौं । रसुवाको भोटेकोशी नदीमा भदौ १० गते बुधबार बिहान आएको भीषण बाढीमा परी मृत्यु हुनेको संख्या ६१६ पुगेको छ।

नेपाल प्रहरीले शनिबार बिहानसम्म विभिन्न जिल्लाबाट ६१६ जनाको शव फेला परेको जनाएको हो।

प्रहरी प्रवक्ता अविनारायण काफ्लेका अनुसार रसुवामा १३, नुवाकोटमा ४१, धादिङमा ४५, चितवनमा २३३, गोरखामा ४८, तनहुँमा ३१, नवलपरासी पूर्वमा १५८ र नवलपरासी पश्चिममा ४७ जनाको शव भेटिएको छ।

प्रहरीका अनुसार थप शव फेला पर्ने क्रम जारी रहेकाले पछिल्लो विवरण संकलन भइरहेको छ। बाढी प्रभावित क्षेत्रमा खोजी तथा उद्धार अभियानलाई निरन्तरता दिइएको छ।

प्रवक्ता काफ्लेले बाढीको जोखिममा रहेका परिवारलाई सुरक्षित स्थानमा सार्ने काम पनि भइरहेको जानकारी दिए। स्थानीय तह, सम्बन्धित निकाय तथा अन्य सरोकारवालासँग समन्वय गरी प्रभावित क्षेत्रमा उद्धार र खोजी अभियान सञ्चालन भइरहेको प्रहरीले जनाएको छ।

बाढीका कारण अवरुद्ध भएका सडक तथा बाटो खुलाउने कामसमेत विभिन्न स्थानमा जारी रहेको प्रहरीले जनाएको छ। खोज तथा उद्धारसँगै प्रभावित नागरिकलाई सुरक्षित स्थानमा व्यवस्थापन गर्ने कार्यलाई पनि प्राथमिकतामा राखिएको छ।