काठमाडौं। भदौ १९ गतेदेखि प्रदर्शनमा आउने तयारीमा रहेको हास्यप्रधान चलचित्र ‘ककाकिकी’को रिलिज मिति सरेको छ।

निर्देशक विक्की अग्रवालले शनिबार सामाजिक सञ्जालमार्फत चलचित्रको प्रदर्शन स्थगित गरिएको जानकारी दिएका हुन्। देश प्राकृतिक विपत्तिको पीडामा रहेका बेला हास्य चलचित्र प्रदर्शन गर्नु उपयुक्त नहुने निष्कर्षसहित रिलिज मिति सारिएको उनले बताएका छन्।

निर्देशक अग्रवालका अनुसार विभिन्न छलफल, सल्लाह र बैठकपछि अहिले चलचित्र प्रदर्शन गर्नुभन्दा विपत्तिबाट सम्हालिन देशलाई समय दिनु उचित हुने निष्कर्ष निकालिएको हो। आर्थिक रूपमा नोक्सान बेहोर्नुपरे पनि अहिलेको परिस्थितिलाई प्राथमिकता दिँदै चलचित्रको प्रदर्शन पछि सारिएको उनको भनाइ छ।

यसअघि भदौ १९ का लागि तय भएको चलचित्र अब मङ्सिर ११ गतेदेखि प्रदर्शनमा आउने भएको छ। निर्देशक अग्रवालले नोभेम्बर २७ अर्थात् मङ्सिर ११ गते चलचित्र प्रदर्शन गर्ने निर्णय भएको बताएका छन्।

‘ककाकिकी’को कथा तथा पटकथा विक्की अग्रवाल, सरोज भण्डारी र विकास अर्यालले तयार पारेका हुन्।

चलचित्रमा रेखा थापा, गौरी मल्ल, तृप्ती नाड्कर, महेश त्रिपाठी, दीया मास्के, शिशिर वाङ्देल, प्रकाश घिमिरे, माओत्से गुरुङ, रेअर राई, खड्गबहादुर पुन मगर र सुवर्ण थापालगायत कलाकारको अभिनय रहेको छ।