ललितपुर। सहिदको सालिक त बन्यो, तर अनुहारै नमिलेपछि अनावरण गर्न खोज्दा विवाद भयो ।

ललितपुरको सातदोबाटोस्थित स्विमिङ पुल कम्प्लेक्स परिसरमा जेनजी आन्दोलनका ४५ सहिदको सम्झनामा तयार पारिएका सालिक अनावरण गर्ने तयारी थियो ।

कार्यक्रमका लागि गृहमन्त्री सुधन गुरुङसमेत पुगेका थिए । तर, सालिकमा आफ्ना आफन्तको अनुहार नचिनिने भन्दै सहिद परिवारले आपत्ति जनाएपछि कार्यक्रम नै रोकियो ।

परिवारजनले सालिकमा सहिदको वास्तविक अनुहार झल्किने गरी सुधार गर्नुपर्ने माग राखेका छन् । अनुहार नसच्याएसम्म अनावरण गर्न नदिने अडान लिएपछि निर्धारित कार्यक्रम अघि बढ्न सकेन ।

अन्ततः गृहमन्त्री गुरुङ सालिक अनावरण नगरी फर्किए । सहिदको सम्झनामा बनाइएको सालिकमै परिवारले प्रश्न उठाएपछि सातदोबाटोमा हुने भनिएको अनावरण कार्यक्रम स्थगित भएको हो ।