काठमाडौं । प्रधानमन्त्री वालेन्द्र शाह(बालेन)ले ठूला उद्योगी तथा व्यवसायीसँग छलफल थालेका छन् ।

प्रधानमन्त्री कार्यालयमा जारी छलफलमा विनोद चौधरी, पवन गोल्यान, उमेश श्रेष्ठ, चन्द्र ढकाललगायत उद्योगी व्यवसायी सहभागी छन् ।

सरकार र निजी क्षेत्रबीचको सहकार्य बलियो बनाउने तथा सुस्त रहेको आर्थिक गतिविधिलाई गति दिने विषयमा छलफल केन्द्रित रहेको प्रधानमन्त्रीको सचिवालयले जनाएको छ ।

छलफलमा मुलुकको वर्तमान आर्थिक अवस्था, उद्योग तथा व्यवसाय सञ्चालनमा निजी क्षेत्रले भोगिरहेका समस्या, लगानीको वातावरण र रोजगारी सिर्जनाका विषय उठेका छन् ।

त्यस्तै, नयाँ लगानी भित्र्याउने, सञ्चालनमा रहेका व्यवसाय विस्तार गर्ने र अर्थतन्त्रमा देखिएका चुनौती समाधान गर्ने उपायबारे पनि उद्योगी व्यवसायीबाट सुझाव लिने काम भइरहेको छ ।

सरकारले निजी क्षेत्रसँगको सहकार्यलाई प्रभावकारी बनाएर लगानीमैत्री वातावरण निर्माण गर्ने र आर्थिक गतिविधि बढाउने विषयलाई छलफलको प्राथमिकतामा राखेको सचिवालयले जनाएको छ।