काठमाडौं । नेपाली कांग्रेसका सभापति गगन थापाले पार्टीको महाधिवेशन तोकिएको मितिबाट एक घण्टासमेत नसर्ने दाबी गरेका छन् ।

महाधिवेशनको मिति फेरबदल हुने हो कि भन्ने आशंकामा नपर्न उनले पार्टीका नेता–कार्यकर्तालाई आग्रह गरेका छन् ।

काठमाडौंमा आयोजित कार्यक्रममा थापाले असोज ३ र ४ गते वडा अधिवेशन हुने र असोज १६ गतेदेखि महाधिवेशनको प्रक्रिया अघि बढ्ने बताए ।

संविधान, कांग्रेसको विधान र अदालतको फैसलाले पार्टीलाई निर्धारित प्रक्रियाबाट पछि हट्ने सुविधा नदिएको उनको भनाइ थियो । त्यसैले महाधिवेशनको मिति सर्ने विषयमा कुनै भ्रम नराख्न उनले आग्रह गरे ।

महाधिवेशनमा कसैलाई सहभागी हुनबाट वञ्चित नगरिएको दाबी गर्दै थापाले सबैको सहभागिता सुनिश्चित हुने बताए । महाधिवेशनबाट नेतृत्व चयन भएपछि पार्टीका सबै पक्षलाई समेटेर कांग्रेस जनतामाझ जाने उनको भनाइ छ ।

महाधिवेशनमा प्रतिस्पर्धा हुने र जित्नेहरू नेतृत्वमा आउने भन्दै उनले नेतृत्वमा नपुगेका नेताकार्यकर्तालाई समेत साथ लिएर ७७ जिल्लामा पुग्ने योजना सुनाए ।

थापाले आफू पूर्वसभापति गिरिजाप्रसाद कोइरालाको कार्यकर्ता भएकाले राजनीतिक जोखिम कहाँ लिनुपर्छ भन्ने राम्रोसँग बुझेको पनि बताए ।

पार्टीभित्रको कमजोरी हटाउने विषयमा कठोर बन्ने र एकता कायम गर्ने सवालमा लचक बन्ने उनको भनाइ थियो । ‘पार्टीभित्रको फोहोर सफा गर्ने कुरामा निर्मम र एकता बनाउन नरम हुने’ आफ्नो राजनीतिक सिकाइ रहेको थापाले बताए ।