काठमाडौं। राष्ट्रिय स्वतन्त्र पार्टी (रास्वपा)का सांसद दीपककुमार साहले सरकारले बाढीपीडितको व्यवस्थापनबाट पन्छिन खोजेको आरोप लगाएका छन्।

महिला तथा सामाजिक मामिला समितिको बैठकमा बोल्दै साहले बाढीपीडितलाई केही रकम उपलब्ध गराएर आफ्नो व्यवस्थापन आफैँ गर्न भन्ने मनस्थितिमा सरकार पुगेको टिप्पणी गरे। उनका अनुसार विपद्को समयमा सरकारले अभिभावकको भूमिका निर्वाह गर्नुपर्नेमा प्रभावित नागरिकको व्यवस्थापनबाट पन्छिन खोज्यो।

प्रभावित नागरिकलाई आर्थिक सहायता मात्र उपलब्ध गराएर समस्या समाधान नहुने भन्दै उनले दीर्घकालीन पुनःस्थापना, पुनर्वास र मनोसामाजिक सहयोगमा सरकारले विशेष ध्यान दिनुपर्ने बताए। सरकारले बाढीपछि राम्रो प्रयास गरेको स्वीकार गर्दै साहले आर्थिक सहयोगसँगै विपद्का कारण प्रभावित नागरिकमा परेको मानसिक तथा मनोवैज्ञानिक आघात सम्बोधन गर्न छुट्टै पुनःस्थापना कार्यक्रम आवश्यक रहेको बताएका छन्। 

साहले जनतामाथि पुगेको चोट,मनोभावना र मस्तिष्कमा परेको आघातलाई सरकारले  गिभरको रोलमा मात्र नभई गार्जियनको रोल अपनाउन सल्लाह दिए।