काठमाडौं । प्रतिनिधिसभालाई प्रविधिमैत्री बनाउँदै ‘डिजिटल संसद्’को अवधारणा अघि बढाउन थालिएको छ। यसबारे मंगलबार बसेको कार्यव्यवस्था परामर्श समितिको बैठकमा छलफल भएको छ।

सिंहदरबारस्थित कार्यव्यवस्था हलमा भएको छलफलमा सांसदहरूले संसद्मा उठाएका विषयको अभिलेखदेखि त्यसको कार्यान्वयनसम्मलाई डिजिटल प्रणालीमा जोड्ने विषय उठेको हो।

सांसदहरूले शून्य, आकस्मिक र विशेष समयमा उठाउने प्रश्न तथा सरोकारलाई सम्बन्धित मन्त्रालय र सरकारी निकायसम्म डिजिटल माध्यमबाट पठाउने योजना अघि सारिएको छ।

त्यसपछि सरकारले ती विषयमा के निर्णय गर्‍यो, काम कहाँ पुग्यो र कहिले सम्बोधन भयो भन्ने विवरणसमेत प्रणालीबाटै हेर्न सकिने व्यवस्था गर्नेबारे छलफल भएको छ।

रास्वपाका सचेतक प्रकाशचन्द्र परियारका अनुसार बैठकमा डिजिटल संसद्को अवधारणामै केन्द्रित भएर छलफल भएको हो। उनका अनुसार यस विषयमा छलफल अझै जारी छ।

डिजिटल संसद् कार्यान्वयनमा आए सांसदले उठाएका विषय केवल संसद्को रेकर्डमा सीमित नरहने र त्यसको कार्यान्वयनको अवस्थासमेत ‘ट्र्याक’ गर्न सकिने अपेक्षा गरिएको छ।