काठमाडौं। देशका विभिन्न ठाउँबाट प्रहरीले अवैध लागूऔषधसहित १२ जनालाई पक्राउ गरेको छ। प्रहरीले काठमाडौं, झापा, सुनसरी, रौतहट, पर्सा र बाँकेबाट ब्राउनसुगर, गाँजा लगायतका लागूऔषधसहित उनीहरूलाई पक्राउ गरेको हो।

काठमाडौंको सोह्रखुट्टेस्थित होटलबाट ३ किलो गाँजासहित म्यानमारकी २९ वर्षीया जिन जिन फ्योलाई प्रहरीले पक्राउ गरेको छ। प्रहरीले उनी बसेको होटलको तलासी गर्दा उक्त परिमाणको गाँजासहित पक्राउ गरेको हो। साथै, थप अनुसन्धानको क्रममा ३० वर्षीय बरकतुल्लान र २५ वर्षीय युसुफ खानलाई समेत प्रहरीले पक्राउ गरेको छ।

त्यसैगरी, प्रहरीले झापाको नयाँ बजारबाट अवैध लागूऔषध ब्राउनसुगर जस्तो देखिने पदार्थ ३ ग्राम ६२ मिलिग्रामसहित बिर्तामोड नगरपालिका–३ बिर्ताबजार बस्ने २२ वर्षीय कुरबान शेखलाई पक्राउ गरेको छ।

साथै, सुनसरीको बराहक्षेत्र नगरपालिका–११ मुसहरीटोलबाट अवैध लागूऔषध ब्राउनसुगर जस्तो देखिने पदार्थ १ ग्राम ३ सय ८० मिलिग्रामसहित २ जनालाई प्रहरीले पक्राउ गरेको छ। पक्राउ पर्नेहरूमा धरान उपमहानगरपालिका–१७ बस्ने २७ वर्षीय हेम राई र ४४ वर्षीय जयबहादुर खड्गी रहेका छन्।

रौतहटको चन्द्रपुर नगरपालिका–५ बाट लागूऔषध नाइट्राजेपाम ३० ट्याब्लेटसहित सोही नगरपालिका–१० बालचनपुर बस्ने १८ वर्षीय किशोरलाई प्रहरीले पक्राउ गरेको छ। त्यस्तै, पर्साबाट अवैध लागूऔषध ब्राउनसुगर जस्तो देखिने पदार्थ २ ग्राम ६ सय २० मिलिग्रामसहित २० वर्षीय आजात अन्सारीसहित २ जनालाई प्रहरीले नियन्त्रणमा लिएको हो। प्रहरीले ग.८ प ७०४४ नम्बरको मोटरसाइकलमा भारतबाट नेपालतर्फ आउँदै गरेका उनीहरूलाई उक्त पदार्थसहित पक्राउ गरेको हो।

बाँकेको कोहलपुर नगरपालिका–१० बाट अवैध लागूऔषध ब्राउनसुगर जस्तो देखिने पदार्थ १० ग्राम ७ सय ८० मिलिग्रामसहित सुर्खेत वीरेन्द्रनगर नगरपालिका–३ बस्ने १९ वर्षीय प्रिन्स शाहीलाई प्रहरीले पक्राउ गरेको छ। प्रहरीले नेपालगन्जबाट काठमाडौंंतर्फ जाँदै गरेको भे.१ ख ४१६० नम्बरको बस जाँच गर्दा उक्त पदार्थ फेला पारी बसका सहचालक प्रिन्सलाई पक्राउ गरेको हो।

साथै, थप अनुसन्धानको क्रममा उक्त पदार्थ राप्ती सोनारी गाउँपालिका–१ बस्ने २८ वर्षीय लाहुराम थारूले दिएको भन्ने खुल्न आएपछि प्रहरीले लाहुरामसहित २ जनालाई नेपालगन्जबाट पक्राउ गरेको छ।

यस सम्बन्धमा प्रहरीले थप अनुसन्धान भइरहेको जानकारी दिएको छ।