काठमाडौं । भोटेकोशीको बाढीले धादिङको फुर्केखोलामा रहेको पुल बगाएको २३ दिन बितिसक्दा पनि अस्थायी बेलिब्रिज निर्माण हुन नसकेको भन्दै नेपाली कांग्रेसकी सांसद सिता थपलिया (उर्मिला)ले सरकारको चर्को आलोचना गरेकी छन्।

प्रतिनिधिसभाको बिहीबारको बैठकमा विशेष समय लिएर बोल्दै थपलियाले बाढी प्रभावित क्षेत्रको पुनर्निर्माणमा सरकारले चरम ढिलाइ गरेको बताइन्। नागरिकको आवागमन र जीवनरक्षाजस्तो विषयमा समेत सरकार गम्भीर नदेखिएको उनको आरोप छ।

‘मैले बारम्बार यस सदनमार्फत ध्यानाकर्षण गराउँदा पनि सरकार कानमा तेल हालेर आँखामा पट्टी बाँधेर बसेको छ,’ उनले भनिन्, ‘के नेपालको नक्साबाट धादिङ जिल्ला हटेको हो ? धादिङका नागरिकहरूले आज आफैँलाई यो प्रश्न गर्न थालेका छन्।’

थपलियाले बाढीबाट प्रभावित धादिङ, रसुवा र नुवाकोटका व्यवसायी तथा सर्वसाधारणलाई राहत दिन बैंक ऋणको ब्याज र विद्युत् महसुल पुनर्स्थापना नभएसम्मका लागि मिनाहा गर्न सरकारसँग माग गरिन्।

कृष्णभीरको पहिरोको दीर्घकालीन समाधान खोज्न मलेखु–ताल्ती हुँदै भण्डारा जोड्ने चेपाङ मार्गलाई वैकल्पिक सडकका रूपमा विकास गर्नुपर्ने उनको सुझाव छ।

उनले अस्पतालबाहिर सडकमा बच्चा जन्माउन बाध्य भएको पछिल्लो घटनालाई समेत सदनमा उठाइन्। अस्पतालमा उपचार पाउनुअघि नै पैसा खोजिएको भन्दै उनले प्रधानमन्त्री र स्वास्थ्यमन्त्रीसँग जवाफ मागिन्।

‘मधेसको छोरो प्रधानमन्त्री हुँदा मधेसकै छोरी–बुहारीको अवस्था यही हो ? अस्पतालले उपचारअघि पैसा खोज्ने कि उपचार ? यसको जवाफ म प्रधानमन्त्री र स्वास्थ्यमन्त्रीसँग चाहन्छु,’ उनले भनिन्।

थपलियाले नयाँ दलहरूले पुराना दललाई गाली गर्दैमा राजनीतिक संस्कार स्थापित नहुने बताइन्।

अरूलाई प्रश्न गर्दा सहज रूपमा लिने तर आफूलाई प्रश्न गरिँदा त्यसलाई प्रतिशोधका रूपमा बुझ्ने प्रवृत्तिमाथि उनले प्रश्न उठाइन्।

‘अरूलाई प्रश्न गर्दा बडो आनन्द मान्नुहुन्छ, तर तपाईंहरूलाई प्रश्न गर्दा प्रतिशोध ठान्नुहुन्छ ? यो कस्तो संस्कार हो ?’ उनले प्रश्न गरिन्।